შეერთებული შტატების მიერ ბიძინა ივანიშვილისათვის სანქციების დაწესებიდან, 27 დეკემბრიდან ოთხ დღეში, 31 დეკემბერს, საქართველოს საჯარო რეესტრში მისი ვაჟის, უტა ივანიშვილის კუთვნილი ახალი კომპანია, სააქციო საზოგადოება ატუ ჰოლდინგი დარეგისტრირდა. ინფორმაციას რადიო თავისუფლება ავრცელებს.

მათი ცნობით, კომპანიის დამფუძნებელი და აქციების 100%-ის მფლობელი ქართული ოცნების საპატიო თავმჯდომარის, ბიძინა ივანიშვილის უფროსი შვილი, უტა ივანიშვილია.

როგორც რადიო თავისუფლება წერს, თავად უტა ივანიშვილი იაპონიაში იმყოფება, ამიტომ კომპანია რეესტრში მინდობილობით ბანკი ქართუს სამეთვალყურეო საბჭოს თავმჯდომარემ, ნატო ხაინდრავამ დაარეგისტრირა.

ატუ ჰოლდინგი სამეთვალყურეო საბჭოს თავმჯდომარე ბანკი ქართუს სამეთვალყურეო საბჭოს წევრი ბესიკ დემეტრაშვილია, ხოლო მისი წევრები არიან: ოცნების შემწირველები — ასოციაცია ატუს გამგეობის თავმჯდომარე როსტომ ჩაბრაძე და სს დაზღვევის კომპანია ქართუს დირექტორი არჩილ მამაცაშვილი.

ატუ ჰოლდინგის დირექტორი ბიძინა ივანიშვილის დისშვილი კახა კობიაშვილია. საერთაშორისო გამჭვირვალობა — საქართველოს ცნობით, სწორედ კობიაშვილია ბიძინა ივანიშვილის საქართველოში მოქმედი ოფშორული კომპანიების ოფიციალური წარმომადგენელი.

სრულად წაიკითხეთ აქ.

შეგახსენებთ, რომ აშშ-ის სახაზინო დეპარტამენტმა ბიძინა ივანიშვილს სანქციები 2024 წლის 27 დეკემბერს დაუწესა.

"ბიძინა ივანიშვილის ხელმძღვანელობით, „ქართულმა ოცნებამ“ წინ წასწია კრემლის ინტერესები და საქართველო ევროატლანტიკური ტრაექტორიის რელსებიდან გადაიყვანა, რაც პირდაპირ ეწინააღმდეგება იმას, რასაც ითვალისწინებს საქართველოს კონსტიტუცია და ქართველი ხალხი", — ნათქვამი იყო აშშ-ს სახელმწიფო დეპარტამენტის მიერ გავრცელებულ ინფორმაციაში.

გადაწყვეტილება აშშ-ის სახაზინო დეპარტამენტის უცხოური აქტივების კონტროლის ოფისმა (OFAC-მა) გამოაქვეყნა.