ცნობილი ფილიპინელი ჟურნალისტი და მშვიდობის დარგში ნობელის პრემიის ლაურეატი მარია რესა ქართველი მედიამენეჯერის, მზია ამაღლობელის, დაკავებას ეხმაურება. ნეტგაზეთი/ბათუმელების დამფუძნებელი და დირექტორი 14 იანვარს გამართულ სასამართლო პროცესზე, სადაც მას აღკვეთის ღონისძიების სახით პატიმრობა შეეფარდა, სწორედ რესას წიგნით როგორ დავამარცხოთ დიქტატორი გამოჩნდა.

"47-დღიანი პროტესტის შემდეგ... წარმოუდგენელია. თავისუფლება საქართველოს", — წერს ნობელიანტი ჟურნალისტი X-ზე. მოგვიანებით მან თავის ნახევარ მილიონზე მეტ გამომწერს ამაღლობელის საქმეზე ევრონიუსის სტატია და საქართველოში მიმდინარე საპროტესტო გამოსვლების ამსახველი ვიდეომასალაც გაუზიარა.

აღსანიშნავია, რომ ფილიპინური ვებგამოცემა Rappler-ის დამფუძნებელი მარია რესა, რომელიც CNN-ის გამომძიებელი ჟურნალისტიც იყო, ფილიპინების ყოფილი პრეზიდენტის, როდრიგო დუტერტეს, კრიტიკის გამო თავადაც გამხდარა სამშობლოში დევნის ობიექტი. იგი ფილიპინების ხელისუფლებამ დააკავა და ყალბი ინფორმაციის გავრცელებაში დამნაშავედ ცნო. როგორ დავამარცხოთ დიქტატორი სწორედ ავტორისეულ გამოცდილებებს ეყრდნობა და ციფრულ ეპოქაში აღმოცენებულ საფრთხეებზე ჰყვება. წიგნის ქართული თარგმანის წარდგენას თბილისში გასულ წელს თავად რესაც ესწრებოდა. ამასთან, იგი საქართველოში მიმდინარე მოვლენებს წინა თვეშიც გამოეხმაურა და პროტესტის მონაწილეებს მხარდაჭერა ვიდეომიმართვით გამოუცხადა.

რაც შეეხება მზია ამაღლობელის საქმეს, ქართველი მედიამენეჯერი რამდენიმე დღის წინ ორჯერ დააკავეს; პირველად ბათუმის პოლიციის სამმართველოს ეზოს ღობეზე სტიკერის გაკვრისთვის, რის გამოც მანამდე კიდევ 9 ადამიანი დააკავეს. რამდენიმე საათში, ამაღლობელი, სამ სხვა დაკავებულთან ერთად, გაათავისუფლეს, მაგრამ მალევე ისევ დააკავეს და ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს. აღსანიშნავია, რომ ბათუმელები/ნეტგაზეთის გავრცელებულ ვიდეოში ისმის, როგორ აგინებს ამაღლობელს საქმეზე დაზარალებულად მიჩნეული ირაკლი დგებუაძე, ბათუმის პოლიციის უფროსი. ჟურნალისტმა თავადაც ისაუბრა პოლიციელის მხრიდან არასათანადო მოპყრობის შესახებ.

ამაღლობელის დაკავებას არასამთავრობო და საერთაშორისო ორგანიზაციები ჟურნალისტის საქმიანობის გამო პოლიტიკური მოტივით დევნად და პრესის თავისუფლებაზე თავდასხმად აფასებენ. დაკავებულისთვის პატიმრობის შეფარდების შემდეგ, 14 იანვარს ქართული ტელეარხებისა და ონლაინგამოცემების ნაწილი გაიფიცა და პროტესტის ნიშნად მუშაობა შეაჩერა.