იუსტიციის მინისტრი თეა წულუკიანი მიიჩნევს, რომ სტრასბურგის სასამართლომ ვანო მერაბიშვილის საქმეზე გამოტანილი გადაწყვეტილებით დაადასტურა, რომ მის მიმართ ორჯერ გამოყენებული წინასწარი პატიმრობა კანონიერი იყო. ამის შესახებ წულუკიანმა დღეს, 14 ივნისს, გადაწყვეტილების გამოქვეყნებიდან მალევე განაცხადა:

სტრასბურგის სასამართლომ შავი თეთრზე თქვა, რომ მერაბიშვილის წინასწარი პატიმრობა იყო კანონიერი

თეა წულუკიანი

"ივანე მერაბიშვილის საქმეზე დღეს გამოქვეყნდა სტრასბურგის გადაწყვეტილება, რომელშიც არის 4 ნაწილი. რაც შეეხება დარღვევის და არდარღვევის ნაწილს, ჩვენთვის ძალიან სასიხარულოა, რადგან რეალობაც არის ასეთი, რომ სტრასბურგის სასამართლომ შავი თეთრზე თქვა, რომ მერაბიშვილის წინასწარი პატიმრობა, რომელიც დაიწყო 2013 წლის მაისში და დასრულდა 2014 წლის თებერვალში, ანუ 2 წელიწადზე მეტი ხნის წინ, არის კანონიერი. აქედან გამომდინარე, ეს იყო ჩვენთვის მთავარი და ეს მიღწეულია. ასევე სასამართლომ თქვა, რომ პირველი 2 გადაწყვეტილება წინასწარი პატიმრობის შესახებ ქართველმა მოსამართლეებმა დასაბუთებულად გამოიტანეს, მით უმეტეს თუ მივიღებთ მხედველობაში, იმას რომ სახეზე იყო მაისურაძის გვარზე გაცემული მერაბიშვილის გაყალბებული პასპორტი".

იუსტიციის მინისტრმა სასამართლოს მიერ გამოტანილი გადაწყვეტილების იმ ნაწილზეც ისაუბრა, რომლის მიხედვითაც, მერაბიშვილის მიმართ საქართველომ დაარღვია ადამიანის უფლებაა ევროპული კონვენციის 2 მუხლი:

"რაც შეეხება დარღვევებს, სტრასბურგის სასამართლომ თქვა, რომ ერთ-ერთი გადაწყვეტილება 2013 წლის სექტემბრის, რომელიც ქართველმა მოსამართლემ ზეპირად, ერთი ფრაზით გამოიტანა წინასწარი პატიმრობის გირაოთი შეცვლაზე უარის შესახებ, იყო არასაკმარისად დასაბუთებული და ეს ჩაითვალა დარღვევად. სტრასბურგის სასამართლომ ასევე თქვა, რომ მერაბიშვილის მიერ მოყოლილი ინციდენტი, რომ თითქოსდა 2014 წლის დეკემბერში ის მიიყვანეს დარბაისელთან და ფარცხალაძესთან, ეს ინციდენტი არ იყო გამოძიებულიო და ალბათ ამიტომ არის მე-18 მუხლის დარღვევა იმიტომ, რომ შეიძლება, სხვა მიზნებიც ჰქონოდა მის წინასწარ პატიმრობაში ყოფნასო. აი ეს არის მთლიანობაში".

თეა წულუკიანის თქმით, კითხვის ნიშანი რადგან გაჩნდა, ფარცხალაძესთან შეხვედრის მიზნით, ვანო მერაბიშვილის საკნიდან გაყვანასთან დაკავშირებით, ეს ეპიზოდი აუცილებლად იქნება გამოძიებული:

"რაც შეეხება თანხის ნაწილს - ივანე მერაბიშვილი ითხოვდა 15 ათას ევროს, მას მიანიჭეს 4 ათასი ევრო, ოთარ კახიძე ითხოვდა 35 ათას ევროს საადვოკატო მომსახურებისთვის და მას მიანიჭეს ასევე 4 ათასი ევრო. ეს გადაწყვეტილება არ არის საბოლოო და ის შევა ძალაში მხოლოდ აგვისტოში და ისიც იმ შემთხვევაში, თუ მე მას არ გავასაჩივრებ".

წულუკიანი ამბობს, რომ ის ევროსასამართლოს გადაწყვეტილებას აუცილებლად გაასაჩივრებს და შესაბამისად, მისი აღსრულება 2017 წლამდე გადაიწევს.

კახიძე: სასამართლომ ჩვენი მთავარი მოთხოვნა დააკმაყოფილა, დანარჩენი უმნიშვნელოა