საქართველოს სახალხო დამცველი, ლევან იოსელიანი საგამოძიებო სამსახურებს მოუწოდებს, რომ ჟურნალისტ ზვიად ქორიძეზე და "გახარია — საქართველოსთვის" გიორგი გახარიაზე თავდასხმის ფაქტებზე პასუხისმგებელი პირების იდენტიფიცირება მოახდინონ, ხოლო ყველა საგამოძიებო მოქმედება სწრაფად და სრულფასოვნად ჩაატარონ.

გავრცელებულ განცხადებაში იოსელიანი აღნიშნავს, რომ თავდასხმის ფაქტებზე მნიშვნელოვანია მყისიერი რეაგირება, რათა პოლიტიკოსებსა და ჟურნალისტებზე თავდასხმა არ წახალისდეს.

"საქართველოს სახალხო დამცველი გმობს გიორგი გახარიაზე და ჟურნალისტ ზვიად ქორიძეზე თავდასხმის ფაქტებს და მოუწოდებს საგამოძიებო სამსახურებს, მოახდინონ პასუხისმგებელი პირების იდენტიფიცირება და სწრაფად და სრულფასოვნად ჩაატარონ ყველა საგამოძიებო და საპროცესო მოქმედება, მათ შორის, მოპოვებულ იქნას ვიდეო ჩანაწერები, გამოიკითხონ მოწმეები და სხვა.

სახალხო დამცველი მნიშვნელოვნად მიიჩნევს აღნიშნულ ფაქტებზე მყისიერ რეაგირებას, რათა პოლიტიკოსებსა და ჟურნალისტებზე თავდასხმა არ გახდეს წახალისებული", — აღნიშნულია ომბუდსმენის განცხადებაში.

ცნობისთვის, 14 იანვარს, ბათუმში, სასტუმრო შერატონში თავს დაესხნენ ექსპრემიერ გიორგი გახარიას, რის შემდეგაც იგი საავადმყოფოში გადაიყვანეს. მან კლინიკა მოგვიანებით დატოვა. როგორც გახარიას ექიმი აცხადებს, პოლიტიკოსს აქვს ტვინის შერყევა და ცხვირის ძვლის მოტეხილობა.

ამასთან, ამავე სასტუმროში, იმავე პირების მხრიდან, თავდასხმა განხორციელდა არასამთავრობო სექტორის წარმომადგენელ ზვიად ქორიძეზე.