აზერბაიჯანული მედია წერს, რომ აზერბაიჯანის სახელმწიფო უსაფრთხოების სამსახურის მიერ ჩატარებული ოპერატიული და საგამოძიებო ღონისძიებების შედეგად დააკავეს საქართველოს მოქალაქე ასლანოვი აგილ გოიჯა ოღლი და აზერბაიჯანის რესპუბლიკის მოქალაქე ისმაილოვი ჯეიჰუნ შაჰინ ოღლუ, რომლებიც აზერბაიჯანში მოქმედი რელიგიური თემის წარმომადგენლის წინააღმდეგ ტერორისტულ აქტს გეგმავდნენ.

როგორც გამოცემა Trend იტყობინება, აგილ ასლანოვი ნარკოტიკების კონტრაბანდით იყო დაკავებული. 2024 წლის სექტემბერში, მესამე ქვეყანაში ყოფნისას, ამ ქვეყნის დაზვერვის ოფიცრებმა, მას 200 ათასი აშშ დოლარის სანაცვლოდ აზერბაიჯანის რელიგიური თემის წარმომადგენლის მკვლელობა დაავალეს.

აგილ ასლანოვს თავდაპირველად იმ ადამიანის შესახებ სადაზვერვო მონაცემების შეგროვება დაევალა. რისთვისაც 2 ათასი აშშ დოლარი ავანსად გადასცეს. დავალების შესასრულებლად ბაქოში ჩასული აგილ ასლანოვი ჯეიჰუნ ისმაილოვთან ერთად აწარმოებდა მუშაობას რელიგიური თემის წევრის შესახებ ინფორმაციის შეგროვებაზე.

სასამართლომ აგილ ასლანოვსა და ჯეიჰუნ ისმაილოვს აღკვეთის ღონისძიების სახით პატიმრობა შეუფარდა.