უკვე წლებია, რაც მელ გიბსონის გახმაურებული ბლოკბასტერის, ქრისტეს ვნებანის, გაგრძელებაზე ვრცელდება ინფორმაცია. თავისი ჩანაფიქრისა და გეგმების შესახებ ამერიკელმა კინორეჟისორმა ცოტა ხნის წინ ჯო როგანის პოდკასტში ისაუბრა. გიბსონს ეპიკურ ბიბლიურ დრამაზე მუშაობის დაწყება მომავალ წელს სურს.

"იმედი მაქვს, [გადაღებებს] მომავალი წლისთვის დავიწყებთ", — აღნიშნავს რეჟისორი, რომელიც თავის ძმასთან და რენდალ უოლესთან ერთად ფილმის სცენარს შვიდი წლის განმავლობაში წერდა. გიბსონის თქმით, ფილმს ქრისტეს აღდგომა ერქმევა, — "მე, ჩემი ძმა და რენდალი ამაზე უკვე შევჯერდით. ასე რომ, რაღაცები დალაგებულია, მაგრამ [სცენარში] წარმოუდგენელი ამბები ხდება; ამბის სათანადოდ მოსაყოლად, ჩემი აზრით, ყველაფერი ანგელოზების დაცემით უნდა დაიწყოს, რაც იმას ნიშნავს, რომ სხვაგან, სხვა სამეფოში უნდა გადავინაცვლოთ. ჯოჯოხეთში, შეოლში უნდა ამოვყოთ თავი".

თავისი პროექტის შესახებ გიბსონმა სხვა დეტალებიც გაამხილა. რეჟისორის გეგმით, იესო ქრისტეს როლს კვლავ ჯიმ ქევიზელი შეასრულებს. თუმცა, რადგან ქრისტეს ვნებანის გამოსვლიდან უკვე 20 წელზე მეტია გასული, მსახიობის "გასაახალგაზრდავებლად" გიბსონი სხვადასხვა ტექნოლოგიის, მათ შორის, CGI-ის გამოყენებასაც განიხილავს.

რაც შეეხება შინაარსს, ფილმში თხრობა კვლავ ბიბლიურ სიუჟეტს მიჰყვება, ამბავი კი, გიბსონის თქმით, "ანგელოზების დაცემიდან ქრისტეს უკანასკნელი მოციქულის სიკვდილამდე" იქნება მოთხრობილი. რეჟისორი ამატებს, რომ თავისი ჩანაფიქრი "საკმაოდ ამბიციურია" და ბოლომდე დარწმუნებულიც კი არაა, რომ მისი შესრულება გამოუვა.

ბიბლიურ ისტორიაზე დაფუძნებული ქრისტეს ვნებანი, რომელიც ეკრანებზე 2004 წელს გამოვიდა, გახდა ყველა დროის ყველაზე მაღალშემოსავლიანი დამოუკიდებელი კინოპროექტი; $30-მილიონიანი ბიუჯეტის საპირწონედ, ფილმის შემოსავალმა $612 მილიონს გადააჭარბა.

ქრისტეს ვნებანისთვის, რომელიც იესო ქრისტეს ცხოვრების ბოლო საათებზე გვიყვება, სცენარი მელ გიბსონმა და ბენედიქტ ფიცჯერალდმა დაწერეს. აღსანიშნავია, რომ ნაწარმოებში დიალოგები მხოლოდ არამეულ, ებრაულ და ლათინურ ენებზეა, რეჟისორი კი ფილმის სხვა ენებზე გახმოვანების წინააღმდეგი იყო.

ქრისტეს ვნებანში სხვადასხვა ქვეყნის მსახიობები მონაწილეობდნენ. იესო ქრისტეს როლი ამერიკელმა ჯიმ ქევიზელმა ითამაშა, მარიამ ღვთისმშობელი რუმინელმა მაია მორგენშტერნმა განასახიერა, მარიამ მაგდალელი კი — იტალიელმა მონიკა ბელუჩიმ.

ჯიმ ქევიზელი და მელ გიბსონი ქრისტეს ვნებანის გადასაღებ მოედანზე

ფოტო: AP / Icon Productions / File

უჩვეულო კომერციული წარმატებისა და ოსკარის სამ ნომინაციაში წარდგენის მიუხედავად, ფილმმა მაყურებელი ორად გახლიჩა. მსახიობების შესრულებამ და რეჟისორის ნამუშევარმა მოწონება კი დაიმსახურა, მაგრამ ნაწილმა ფილმი ძალადობის დაუფარავი სცენებისთვის გააკრიტიკა; ზოგმაც, შინაარსის გამო, მელ გიბსონი ანტისემიტიზმში დაადანაშაულა.

ქრისტეს ვნებანის გაგრძელებაზე ხმები პირველად 2016 წელს გავრცელდა, როცა სცენარისტმა რენდალ უოლესმა განაცხადა, რომ მან და გიბსონმა პროექტზე მუშაობა დაიწყეს. 2018 წელს ჯიმ ქევიზელმა თქვა, რომ გიბსონმა მას სცენარის მესამე ვარიანტი გაუგზავნა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...