საქართველოს პრეზიდენტის საგარეო ურთიერთობათა მდივანი, თენგიზ ფხალაძე ხანძრის ლიკვიდაციასთან დაკავშირებით რუსეთისათვის დახმარების თხოვნაზე ამბობს, რომ მსგავსი მოლაპარაკებების შესახებ საზოგადოებას ამომწურავი ინფორმაცია უნდა მიეწოდოს. ფხალაძის კომენტარს ამ საკითხზე პრეზიდენტის ადმინისტრაცია ავრცელებს.

"ჩვენ გვახსოვს ასეთივე შემთხვევა გვქონდა კომპანია გაზპრომთან მიმართებაში და ძალიან ცუდია, რომ ეს ყველაფერი იძენს ერთგვარი ტენდენციის სახეს", - აღნიშნავს ფხალაძე.

საქართველოს საგარეო საქმეთა სამინისტროში ადასტურებენ, რომ ბორჯომის ხეობაში ხანძრის ჩასაქრობ ტექნიკით დახმარებაზე რუსეთის ფედერაციასთან მოლაპარაკება გაიმართა. სამინისტროში ამბობენ, რომ შვეიცარიის საელჩოს მეშვეობით რუსეთის მხარეს შესაბამისი ნოტა გაეგზავნა.