საქართველოს პრეზიდენტი სალომე ზურაბიშვილი რუსთაველის გამზირზე, აქციაზე შეკრებილ მოქალაქეებთან მივიდა და მათ მიმართა: "თურმე გადაიდო ამ საღამოს ამ ნაძვის ხის ანთება. მე მგონია, ბარბარობაზე ჩემთან მოდიან".

ზურაბიშვილმა მოქალაქეებს მშვიდობიანი საღამო უსურვა და გამოთქვა სურვილი, რომ "არ იყოს აქ (აქციაზე) არანაირი პროვოკაცია".

ამასთან, მან ისაუბრა თბილისი მერის გადაწყვეტილებაზე, რომლის თანახმად, დღეს დაგეგმილი ნაძვის ხის ანთების ცერემონია გადაიდო.

"ნაძვის ხის ანთება ამ საღამოს აღარ იქნება. თქვენ, ყველანი ერთად იყავით მშვიდობიანად, იყავით ერთად და მე ვარ თქვენთან ერთად იმიტომ, რომ აქ, არც ერთ პროვოკაციას არ დავუშვებთ. მე ვარ თქვენთან, თქვენ ხართ ჩემ გულში", — მიმართა სალომე ზურაბიშვილმა რუსთაველზე მყოფ მოქალაქეებს.

საპასუხოდ ზურაბიშვილის მისამართით ისმოდა შეძახილები: "მადლობა", "საქართველოს პრეზიდენტს გაუმარჯოს".

შეგახსენებთ, სალომე ზურაბიშვილმა წინა დღით, 13 დეკემბერს, პრეზიდენტის სასახლეში გამართულ ბრიფინგზე თბილისის მერ კახა კალაძეს მიმართა, რომ თუ 14 დეკემბერს, მიმდინარე პროტესტის ფონზე ნაძვის ხის ანთება და იქ ბავშვების მიყვანა პროვოკაცია არ არის, მაშინ ბარბარობას გადადოს ღონისძიება და ორბელიანების სასახლეში მიიყვანოს ისინი.