საქართველოს საგარეო საქმეთა სამინისტროში ადასტურებენ ბორჯომის ხეობაში ხანძრის ჩასაქრობ ტექნიკით დახმარებაზე რუსეთის ფედერაციასთან მოლაპარაკება გაიმართა. სამინისტროში ამბობენ, რომ შვეიცარიის საელჩოს მეშვეობით რუსეთის მხარეს დახმარების ნოტა გაეგზავნა. ამის შესახებ სამინისტროს პრესსამსახურმა On.ge-ს მიაწოდა ინფორმაცია.

"მოხდა მოძიება ყველა საჭირო ტექნიკის, რომლის გამოყენებაც არსებულ მოცემულობაში შესაძლებელს გახდიდა ეფექტურ რეაგირებას. მათ შორის იყო ტექნიკა, რომელსაც ფლობს რუსეთის ფედერაცია. შესაბამისად, შედგა სატელეფონო საუბარი რუსეთთან ურთიერთობის საკითხებში პრემიერ-მინისტრის სპეციალურ წარმომადგენელს, ზურაბ აბაშიძესა და რუსეთის საგარეო საქმეთა მინისტრის მოადგილე, გრიგორი კარასინს შორის, რომლის დროსაც რუსეთის მხრიდან გამოიხატა მზაობა დახმარების ისეთი ტექნიკით, რომელიც გართულების შემთხვევაში შესაძლებელს გახდიდა ხანძრის სალიკვიდაციო სამუშაოების ეფექტურ წარმოებას", - აღნიშნავენ საგარეო საქმეთა სამინისტროში და დასძენენ, რომ მოგვიანებით რუსეთის დახმარება საჭირო აღარ გახდა.

უწყებაში განმარტავენ, რომ საგანგებო ვითარების დროს, სამაშველო სამსახურების ურთიერთობა მიღებული პრაქტიკაა, ბორჯომის ხეობაში ხანძრის სტიქიის მასშტაბები და შექმნილი უაღრესად კრიტიკული ვითარება კი მოითხოვდა ოპერატიულ, ეფექტურ ქმედებებსა და შესაბამისი ტექნიკის მოძიებას.

"ქართულმა მხარემ მიიღო გადაწყვეტილება, ხანძრის სალიკვიდაციო ღონისძიებებში დახმარებისთვის მიემართა სხვა სახელმწიფოებისათვის. მიმართვა მოხდა როგორც გაეროს, ევროკავშირის, ნატოს, ასევე სხვა პარტნიორი ქვეყნებისადმი", - აღნიშნავენ საგარეო საქმეთა სამინისტროში.

26 აგვისტოს საქართველოს რეგიონული განვითარებისა და ინფრასტრუქტურის მინისტრი, ზურაბ ალავიძე ამბობდა, რომ რუსეთს ხანძრის ჩასაქრობად მოთხოვნა გაერომ გაუგზავნა.

"გაერო-ს მივმართეთ და მათი არხებით მოხდა სხვადასხვა სახელმწიფოსთვის მოთხოვნა, პროცედურა აქვთ, ზუსტად ვერ ვერკვევი. როგორც ვიცი, ამ არხით იყო ეს ყველაფერი გაკეთებული", - ამბობდა ზურაბ ალავიძე.