ბრიტანეთის ელჩი საქართველოში გარეტ უორდი ქვეყანაში მიმდინარე მოვლენებთან დაკავშირებით ვიდეომიმართვას ქართულად ავრცელებს. ელჩი აცხადებს, რომ შოკირებულია ძალადობით, რომელიც გამოიყენა პოლიციამ და არაფორმალურმა ჯგუფებმა მომიტინგეების, ჟურნალისტებისა და ოპოზიციის წარმომადგენლების მიმართ.

"ბოლო ორი კვირის განმავლობაში ვხედავთ, თუ როგორ გამოხატავს ქართველი ხალხი წინააღმდეგობას მთელი ქვეყნის მასშტაბით, ქართული ოცნების მიერ მიღებული გადაწყვეტილებების, მათ შორის ევროატლანტიკური გზიდან გადახვევის შესახებ.

შოკირებულები ვართ ძალადობით, რომელიც გამოიყენა პოლიციამ და არაფორმალურმა ჯგუფებმა მომიტინგეების, ჟურნალისტებისა და ოპოზიციის წარმომადგენლების მიმართ.
როგორც ჩვენმა საგარეო საქმეთა მინისტრმა აღნიშნა, ეს ძალადობა მიუღებელია და უნდა შეწყდეს. შესაბამისად, მინისტრმა ასევე შეზღუდა დიდ ბრიტანეთსა და საქართველოს შორის არსებული ორმხრივი თანამშრომლობა. ეს ნიშნავს, რომ ჩვენ ვაჩერებთ საქართველოს მთავრობის პროგრამულ მხარდაჭერას, როგორიცაა საჯარო ადმინისტრაციის რეფორმისა და შერიგებისა და სამოქალაქო თანასწორობის სახელმწიფო მინისტრის აპარატის, მშვიდობის ფონდის დაფინანსებას
ასევე ვზღუდავთ სამხედრო სფეროში თანამშრომლობას, მაგალითად აღარ ვეხმარებით საქართველოს თავდაცვის სამინისტროს კიბერუსაფრთხოების საოპერაციო ცენტრის მშენებლობაში. ასევე შევზღუდავთ პოლიტიკურ შეხვედრებსა და ურთიერთობას. უორდროპის სტრატეგიულ დიალოგს ვერ განვაახლებთ ამ ვითარებაში.
ანგარიშვალდებულება აუცილებელია.
400-ზე მეტი ადამიანია დაკავებული და, სახალხო დამცველის მიხედვით, უმეტესობას აღენიშნება ცემის ნიშნები, უნდა ჩატარდეს სწრაფი და დამოუკიდებელი გამოძიება პოლიციის მხრიდან გადამეტებული ძალის გამოყენების შესახებ.
მოვუწოდებთ ქართული ოცნებას ხელმძღვანელობას, მოუსმინოს იმ დასავლელ პარტნიორებს, რომლებიც 20 წელზე მეტია მხარს უჭერენ საქართველოს სუვერენიტეტის დაცვას რუსული ზეწოლის წინააღმდეგ.
დარწმუნებულები ვართ, რომ საქართველოს შეუძლია, გახდეს ევროპის ერთ-ერთი წარმატებული მრავალპარტიული დემოკრატია. სხვა არჩევანი არის ავტოკრატია. ჩვენ გვჯერა საქართველოს დემოკრატიის.", — თქვა გაერთიანებული სამეფოს ელჩმა საქართველოში, გარეტ უორდმა ქართულ ენაზე გავრცელებულ განცხადებაში.