კონფლიქტოლოგი და ისტორიკოსი ვანო აბრამაშვილი მომიტინგეების მიერ კუბოს დაწვის პერფორმანსს ეხმაურება. აბრამაშვილი იმ ადამიანებს, ვინც სიკვდილამდე ნაცემ თანამოქალაქეებზე დარდის ნაცვლად დამწვარ კუბის დასტირის, ფარისევლებს უწოდებს.

"ნაწილი ჩვენი ძვირფასი საზოგადოებისა, ვინც ჩინურ კუბოს დასტირის და ამ ორი კვირის მანძილზე ვერაფრით შეამჩნია ლამის სიკვდილამდე ნაცემ ადამიანთა ტკივილი და მათი ღირსების გათელვა, სამწუხაროდ მსგავსია იმ ფარისევლებისა, რომლებიც ქრისტეს მოსაკლავად გაეკიდნენ და უღმერთო უწოდეს იმის გამო, რომ ჯერ განრღვეული განკურნა (იოანე 5) და შემდეგ ბრმადშობილს აუხილა თვალები (იოანე 9) "მაინცდამაინც" უქმე — შაბათ დღეს!
სამწუხაროა, რომ ყოველთვის იყვნენ და იქნებიან ისინი, ვისთვისაც ადამიანის ნუგეში კი არაა მთავარი ან თუნდაც რაიმე პროცესის შინაარსი, არამედ ფორმა და რიტუალური ესთეტიკა. ამიტომაც, ეს რომ დავძლიოთ უნდა გვახსოვდეს, რომ "ქრისტე იესოში არც წინადაცვეთილობასა აქვს რაიმე ძალა და არც წინადაუცვეთელობას, არამედ რწმენას, რომელიც მოქმედებს სიყვარულით." (გალატელთა 5:6)", — წერს აბრამაშვილი.

კუბოს დაწვას საპატრიარქო განცხადებით გამოეხმაურა და ფაქტს "მჩხიბაობის აქტი" უწოდა.

შეგახსენებთ, აქციის მონაწილეებმა პარლამენტის წინ დაწვეს კუბო, რომელშიც ბიძინა ივანიშვილის ფიტული იყო. სამთავრობო პროპაგანდამ გაავრცელა ინფორმაცია, რომ საპროტესტო აქციის მონაწილეებმა ქვეყნის მთავარ გამზირზე იესო ქრისტეს გამოსახულებიანი კუბო მიიტანეს და ცეცხლი წაუკიდეს. პროსახელისუფლებო მედიასაშუალებები შეეცადნენ პროევროპული აქციის დისკრედიტაცია სოციალურ ქსელში რელიგიურ გრძნობებზე მანიპულაციით მოეხდინათ. აქცენტი გაკეთდა არა ბიძინა ივანიშვილის ფიტულის დაწვაზე, არამედ იმაზე, რომ კუბოზე გამოსახული მაცხოვრის გამოსახულება განადგურდა.