კახა კალაძემ დედაქალაქის მთავრობის დღევანდელ სხდომაზე განაცხადა, რომ გამოცხადებული რეორგანიზაცია არანაირ კავშირში არ არის იმ პროცესებთან, რაც ბოლო დღეების განმავლობაში ხდება დედაქალაქში, რადგან რეორგანიზაცია "მანამდე ჰქონდათ გამოცხადებული".

"გაცილებით ადრე გამოცხადდა რეორგანიზაცია, ბოლოს 2017 წელს განვახორციელეთ რეორგანიზაცია, სამსახურების ოპტიმიზაცია და შესაბამისად, დავიწყეთ აღნიშნულის განხორციელება, რადგან ვფიქრობ, მნიშვნელოვანია იმისათვის, რომ მდგომარეობა კიდევ უფრო გავაჯანსაღოთ. კიდევ უფრო გავაძლიეროთ და გავამარტივოთ სამსახურების მუშაობა, რაც რა თქმა უნდა, უნდა აისახებოდეს დედაქალაქზე და დედაქალაქში მცხოვრებ ადამიანებზე. ბევრი შეფასებები მოვისმინეთ, რაც სიმართლეს არ შეესაბამება. პირველი, მინდა ხაზი გავუსვა, რომ საერთოდ არანაირ კავშირში არ არის აღნიშნულ მიმდინარე პოლიტიკურ პროცესებთან რეორგანიზაცია", – განაცხადა კალაძემ.

მისივე თქმით, ტყუილია, თითქოს მერიაში პრემიების გაცემა-არგაცემის საკითხს თანამშრომლების დასაშანტაჟებლად იყენებენ.

"2017 წლიდან ვარ თბილისის მერი, თქვენ ვერ მოიყვანთ ვერცერთ შემთხვევას, რომ ჩვენ ვიღაცა დაგვესაჯა პოლიტიკური შეხედულებების გამო, ან ვიღაცის მიმართ მქონოდა არასამართლიანი დამოკიდებულება თავისის შეხედულებების გამო სხვადასხვა საკითხთან მიმართებაში. ბუნებაში არ არსებობს არცერთი მაგალითი, რომ ჩვენ ადამიანები დაგვეყო პოლიტიკური ნიშნით ან რაღაც შეხედულებების გამო. რაც შეეხება ზოგადად პრემიის საკითხს, პრემიას განსაზღვრავს კანონმდებლობა, ხდება კონკრეტული თანამშრომლის შეფასება მის საქმიანობასთან დაკავშირებით, თუ როგორ მუშაობს ის და რა თქმა უნდა, მისივე სამსახურის ხელმძღვანელი იღებს გადაწყვეტილებას და აკეთებს იმას, რას რაც არის კანონით გათვალისწინებული. არცერთი შემთხვევა არ ყოფილა, რომ ჩვენ ვინმე დაგვეჩაგრა, ვინმეს მიმართ გვქონდა უსამართლო დამოკიდებულება", — განაცხადა კალაძემ.

შეგახსენებთ, რომ 2 დეკემბერს "ქალაქ თბილისის მუნიციპალიტეტის მულტიფუნქციური ბიბლიოთეკების გაერთიანების" დირექტორმა ნინია მაჭარაშვილმა დაწერა, რომ თბილისის მერმა მას თანამდებობის დატოვება მოსთხოვა.

გათავისუფლების მოთხოვნის მიზეზი 30 ნოემბერს, ორგანიზაციის ოფიციალურ ფეისბუქ გვერდზე გამოქვეყნებული განცხადება გახდა, რომლითაც მედიათეკებისა და ბიბლიოთეკების 246 თანამშრომელი აპროტესტებდა საქართველოს არალეგიტიმური მთავრობის მიერ ევროინტეგრაციის გზიდან გადახვევასა და მშვიდობიანი დემონსტრანტების მიმართ სასტიკი ძალის გამოყენებას.

ამავე თემაზე:

კალაძემ მერიის ააიპ-ის დირექტორს, "ოცნების" კრიტიკის გამო, თანამდებობის დატოვება მოსთხოვა