თბილისის მერმა, კახა კალაძემ, ქართული ოცნების კრიტიკის გამო, თანამდებობის დატოვება მოსთხოვა "ქალაქ თბილისის მუნიციპალიტეტის მულტიფუნქციური ბიბლიოთეკის გაერთიანების" დირექტორს, ნინია მაჭარაშვილს.

მაჭარაშვილის თქმით, მისი დირექტორის თანამდებობიდან გათავისუფლებაზე მოთხოვნის მიზეზი 30 ნოემბერს გახდა, როდესაც მან ორგანიზაციის Facebook გვერდზე მედიათეკებისა და ბიბლიოთეკების 246 თანამშრომელს საპროტესტო განცხადება გამოაქვეყნა, რომელშიც ისინი გმობენ "საქართველოს არალეგიტიმური მთავრობის მიერ ევროინტეგრაციის გზიდან გადახვევასა და მშვიდობიანი დემონსტრანტების მიმართ სასტიკი ძალის გამოყენებას“.

როგორც მაჭარაშვილმა აღნიშნა, კალაძეს მის მიმართ "პირადი გაღიზიანება აქვს".

"დღეს დამიბარეს თბილისის მუნიციპალიტეტის მერიაში, კერძოდ კულტურის, განათლების, სპორტისა და ახალგაზრდობის საქალაქო სამსახურის უფროსმა ირაკლი გვილავამ და მომთხოვა განცხადების დაწერა სამსახურიდან გათავისუფლების თაობაზე ორი მოტივით: "ჩვენი დამოკიდებულებები (ჩემი და მერიის) მიმდინარე მოვლენებთან დაკავშირებით არ ემთხვევა ერთმანეთს". დასახელდა ისიც, რომ კახა კალაძეს ჩემ მიმართ პირადი გაღიზიანება აქვს.

ცხადია, ეს პოლიტიკური მოტივია. ცხადია, მერიაში გადაწყვეტილების მიმღები პირები გაღიზიანებული არიან "თბილისის მულტიფუნქციური ბიბლიოთეკების" თანამშრომლების საჯარო პროტესტით, რომელიც ორი დღის წინ გავავრცელეთ. გაერთიანების 246-მა თანამშრომელმა საჯაროდ გააპროტესტა საქართველოს ევროინტეგრაციის პროცესის შეჩერება და თბილისის ქუჩებში მშვიდობიანი მომიტინგეების სასტიკი დარბევა", — აცხადებს ნინია მაჭარაშვილი.

იგი ასევე აცხადებს, რომ არ გეგმავს გათავისუფლებაზე განცხადების დაწერას და საკუთარი უფლებების დასაცავად მზადაა.

"მსურს, ჩემი ეს გადაწყვეტილება საჯარო სამსახურში დასაქმებული სხვა ადამიანებისთვის მოტივაციის მიმცემი აღმოჩნდეს. აქვე აღვნიშნავ, რომ თუ განცხადებას საკუთარი ნებით დავწერდი, მაშინ აღარ მომთხოვდნენ აღნიშნულ განცხადებაზე ხელმომწერთა სიას, რომლის გაზიარებაზეც თავიდანვე უარი ვუთხარი, რათა ისინიც არ აღმოჩენილიყვნენ ზეწოლის ქვეშ და სამსახურის დაკარგვის საფრთხის წინაშე, რომელიც მათთვის სასიცოცხლოდ მნიშვნელოვანია.

მიმაჩნია, რომ არცერთი პოზიცია, არცერთი სამსახური არ ღირს საკუთარი სინდისის ღალატად. მტკიცედ მჯერა იმ განცხადების შინაარსისა, რომელიც ორი დღის წინ ჩემი ინიციატივით გამოქვეყნდა. მადლობას ვუხდი ბიბლიოთეკარებს სწორი პოზიციისთვის, მხარდაჭერისთვის, მათ მიერ გაწეული შრომისა და საბიბლიოთეკო საქმეში მრავალწლიანი ღირსეული მოღვაწეობისთვის", — აცხადებს ნინია მაჭარაშვილი.

შეგახსენებთ, რომ 1 დეკემბერს თბილისის მერმა კახა კალაძემ მერიაში რეორგანიზაციის პროცესის დაწყებასთან დაკავშირებით განაცხადა.

საქართველოში მიმდინარე პროცესების და "ქართული ოცნების" მიერ მიღებული გადაწყვეტილების, რომელიც გულისხმობს 2028 წლამდე ევროკავშირში გაწევრიანების პროცესის შეჩერებას — მერიაში დასაქმებული პირების პროტესტი მოჰყვა და ისინი ერთმნიშვნელოვნად გაემიჯნნენ პარტიის მიერ გაჟღერებულ განცხადებას.

ამასთან, სისხლის სამართლის კოდექსის მიხედვით, პირის იძულება, დაწეროს განცხადება საკუთარი ინიციატივით სამუშაოდან განთავისუფლების თაობაზე, წარმოადგენს 169-ე მუხლის დანაშაულს.