ქართული დიასპორის წარმომადგენლებმა ნორვეგიაში შეხვედრა გამართეს საქართველოს ელჩთან, ზურაბ ბერიძესთან.

შეხვედრის მთავარი მოთხოვნა იყო მისი, როგორც საქართველოს სახელმწიფოს წარმომადგენლის მიერ საჯარო განცხადების გაკეთება საქართველოში მიმდინარე პროცესების შესახებ. კონკრეტულად, მთავრობის მიერ კონსტიტუციით განსაზღვრული ევროატლანტიკური კურსის შეჩერებაზე, უკანონო დაპატიმრებებსა და იმ ძალადობრივ ანგარიშსწორებებსა და ტერორზე, რომელსაც პარტია ქართული ოცნება და მის მიერ მძევლად აყვანილი საჯარო სექტორი მშვიდობიანი დემონსტრანტების წინააღმდეგ ყოველდღიურად იყენებენ.

მოქალაქეების კითხვაზე, თუ რას ფიქრობს ელჩი ევროატლანტიკური კურსის შეჩერებაზე, მან აღნიშნა, რომ ეს ინფორმაცია სიმართლეს არ შეესაბამება, რადგან ეს პროცესი ევროკავშირის მიერ 2030 წლამდე ისედაც შეჩერებული იყო. გარდა ამისა, აღნიშნა, რომ ვერ შეუერთდება მისი კოლეგა დიპლომატებისა და საგარეო საქმეთა უწყების წარმომადგენლების განცხადებას მთავრობის ანტიევროპული კურსის დაგმობის შესახებ, რადგან არ იცის, ვინ არის ამ დოკუმენტის ავტორი.

დარბევებსა და პოლიციის მიერ მოქალაქეებზე ძალადობაზე საუბრისას ელჩმა სინანული გამოთქვა, თუმცა იქვე დაამატა, რომ პარიზის დემონსტრაციებში პოლიციის რეაგირება ბევრად უფრო მკაცრია, ვიდრე საქართველოში.

ელჩმა ასევე განაცხადა, რომ მისი პროფესიული მანდატიდან გამომდინარე, არ აქვს ამ საკითხებზე საჯაროდ საუბრის უფლება და ამას გააკეთებს მხოლოდ 2 წლის შემდეგ, როდესაც პენსიაზე გავა.

ჩვენ მიგვაჩნია, რომ საქართველოს სახელმწიფოს ყველა წარმომადგენელმა, როგორც ქვეყნის შიგნით, ასევე მის ფარგლებს გარეთ, უნდა აიღოს პასუხისმგებლობა ქვეყნის დემოკრატიისა და ევროატლანტიკური კურსის დასაცავად. შესაბამისად, ჩვენ კვლავ მოვითხოვთ, რომ ელჩმა საჯაროდ დააფიქსიროს თავისი პოზიცია მიმდინარე მოვლენებზე ან დატოვოს დაკავებული თანამდებობა.