"პოლიციის შესახებ" კანონში დაგეგმილი ცვლილებების პროექტის მიხედვით, რომელიც პარლამენტში უკვე ინიციირებულია, შინაგან საქმეთა მინისტრს ენიჭება უფლებამოსილება, პოლიციაში სამუშაოდ პირი სპეციალური კონკურსის გავლის გარეშე მიიღოს და საკუთარი ბრძანებით კონკურსის გარეშე პოლიციაში მიღების წესი და პირობები განსაზღვროს.

აღსანიშნავია ისიც, რომ პროექტი იმ საკანონმდებლო ცვლილებათა პაკეტის ფარგლებშია წარდგენილი, რომელიც პიროტექნიკის შემოტანა-რეალიზაციასთან დაკავშირებულ რეგულაციებს ეხება.

პროექტის თანახმად, კანონი 2025 წლის 1-ელი იანვრიდან ამოქმედდება

ცნობისთვის, "პოლიციის შესახებ" ჯერ კიდევ მოქმედ კანონში წერია, რომ პირი, რომელიც მიღებული იქნება პოლიციაში სამუშაოდ, აუცილებლად უნდა ჰქონდეს სპეციალური კურსი გავლილი. პროექტის მიხედვით კი, პოლიციაში სამუშაოდ პირი, როგორც წესი, მიღებული უნდა იქნას სპეციალური კონკურსის გავლის შედეგად, ხოლო სპეციალური კონკურსის გავლის გარეშე პოლიციაში მიღების წესი და პირობები კი მინისტრის ბრძანებით განისაზღვრება.

“2025 წლის 1-ელი იანვრიდან სამხედრო სამსახური მხოლოდ თავდაცვის სამინისტროში იარსებებს. შესაბამისად, გასამხედროებული დანაყოფების საქმიანობის სპეციფიკის გათვალისწინებით, საჭიროა პოლიციაში სამსახურის მიღების გარკვეული წესები მოდიფიცირდეს და პოლიციაში არსებულ პოზიციებზე მათი სპეციფიკის გათვალისწინებით, მიღების განსხვავებული წესები დადგინდეს”, - ვკითხულობთ კანონის პროექტის განმარტებით ბარათში.

ცნობისთვის, პროექტის ავტორი და ინიციატორები არიან ქართული ოცნების წარმომადგენლები: — რატი იონათამიშვილი, ალექსანდრე ტაბატაძე, თენგიზ შარმანაშვილი, ნინო წილოსანი, ალუდა ღუდუშაური, ირაკლი შატაკიშვილი და გურამ მაჭარაშვილი.