საქართველოს ამ მთავრობასთან თანამშრომლობა არსებითად ვეღარ განხორციელდება, — ასე ეხმაურება გერმანიის ეკონომიკური თანამშრომლობისა და განვითარების მინისტრი, სვენია შულცე საქართველოს ხელისუფლების მიერ ევროკავშირთან მოლაპარაკებების 2028 წლის ბოლომდე შეჩერებას. მისი თქმით, საქართველოს ხელისუფლება ამ ნაბიჯით თავისი მოქალაქეების ევროპული მომავლის შანსს ბლოკავს.

"აღნიშნული გადაწყვეტილებით, საქართველოს ხელისუფლება, დროებით მაინც, თავისი მოქალაქეების ევროპული მომავლის შანსს ბლოკავს. ქართველების დიდი უმრავლესობა ევროკავშირში გაწევრიანებას მხარს უჭერს. ყოველდღე, თბილისსა და სხვა ქალაქებში ხალხი ქუჩებში გამოდის, რადგან მათ ევროპული საქართველო სურთ. ამასთან, ევროკავშირთან დაახლოება საქართველოს კონსტიტუციაშიც არის დაფიქსირებული. განვითარების სამინისტრო აქამდე საქართველოს ევროპულ გზას მხარს უჭერდა. საქართველოს ამ მთავრობასთან ეს თანამშრომლობა არსებითად ვეღარ განხორციელდება. მომავალში, თუ საერთოდ, ეს ვალდებულება შეიძლება გაგრძელდეს იქ, სადაც ეს ქვეყნის ევროპულ კავშირებს გააძლიერებს", — აცხადებს გერმანიის ეკონომიკური თანამშრომლობისა და განვითარების მინისტრი.