დღეს, დილის საათებში სპეცრაზმის მიერ გასროლილი გაზის კაფსულა ერთ-ერთ დემონსტრანტს შუბლში მოხვდა და მძიმედ დაშავდა. 22 წლის დემონსტრანტი ინგოროყვას კლინიკაში დილის 4 საათისთვის გადაიყვანეს, რა დროსაც კომატოზურ მდგომარეობაში იმყოფებოდა.

ინგოროყვას კლინიკის ექიმმა მის მდგომარეობაზე კომენტარი გააკეთა:

"პაციენტი, 21 წლის, მიღებულია სკალპის ღია ჭრილობით , შუბლის, ძვლის და თვალბუდის ზედა კიდის მოტეხილობით, შუბლის წილის კონტუზიური დაზიანებით, შესაბამისად, თვალის კაკლების მთლიანობა ტრავმული დაზიანების გარეშე ამ დროისათვის შენარჩუნებულია. თავის ტვინის გარსებში ტრავმული სისხლჩაქცევით, დაუყოვნებლივ გადაყვანილ იქნა საოპერაციო ბლოკში , ჩაუტარდა დაზიანებული ფრაგმენტების ამოკვეთა, ამ მომენტისათვის პაციენტის მდგომარეობა არის სტაბილური, აგრძელებს რეანიმაციაში მკურნალობას, ჩაუტარდა განმეორებითი კომპიუტერული ტომოგრაფია უარყოფითი დინამიკის გარეშე. ჭრილობაში არ იქნა ნანახი უცხო სხეული. პაციენტი შემოყვანილია დაახლოებით დილის 4 საათზე და დაუყოვნებლივ გადაყვანილი საოპერაციო ბლოკში. ამ ეტაპისთვის მისი მდგომარეობა შეესაბამება მის პოსტტრავმულ მდგომარეობას, იმყოფება მედიკამენტოზური ძილის ქვეშ, სტაბილური ჰემოდინამიკით. მართვით სუნთქვაზეა ბუნებრივად, იმიტომ რომ იმყოფება მედიკამენტოზური ძილის ქვეშ" — ამბობს ექიმი ინგოროყვას კლინიკაში გადაყვანილ 22 წლის ახალგაზრდაზე.

ინგოროყვას კლინიკაში მედიებთან ისაუბრა დაშავებული დემონსტრანტის ბიძამაც, იოსებ ჩანადირმა, რომელმაც განაცხადა, რომ ბიჭი დაშავებისას მეგობარ გოგოსთან ერთად სპეცრაზმის ალყაში იმყოფებოდა. ერთი გაზის კაფსულა გოგოს ფეხში მოხვდა, ბიჭს კი — თავში.

"ალექსი არის ძალიან უწყინარი, ყველაზე საყვარელი ბავშვი, რომლის მშობლებიც არიან ემიგრაციაში. „აყვავებული“ ქვეყნიდან არიან წასულები ლუკმა-პურის საშოვნელად," — განუცხადა დემონსტრანტის ბიძამ ინტერპრესნიუსს.

იხილეთ ასევე:

არსებული ინფორმაციით, აქციაზე დაშავებული 22 წლის ბიჭი მართვით სუნთქვაზე იმყოფება