სახალხო დამცველი, ლევანი იოსელიანი აცხადებს, რომ დაკავებული პირების ნაწილს, რომლებიც ზაჰესის დროებითი მოთავსების იზოლატორში მოინახულა, ფიზიკური დაზიანებები ვიზუალურად ეტყობათ.

მანვე აღნიშნა, რომ ის ფაქტია საგანგაშო, როცა მომიტინგეების მიმართ ძალადობის ფაქტებზე გამოძიების მიმდინარეობა კონკრეტულ შედეგს არ დებს.

"20-მდე დაკავებული მოვინახულე, ესენი არიან, როგორც დღეს დილით, ასევე გუშინ დაკავებულები. მათ ნაწილს გარეგნულადაც აღენიშნება ფიზიკური დაზიანებები. ეს აღარ არის უჩვეულო სურათი, წინა ვიზიტის დროსაც, დიღმის იზოლატორშიც ანალოგიური სურათი დამხვდა. როცა პოლიცია მომიტინგეებს აკავებს, ფაქტია, რომ ხშირ შემთხვევაში ძალას ამეტებს და ეს ძალიან ცხადად ჩანს, როცა შედიხარ და ამ ადამიანებს ხვდები, რადგან ძირითადად, ყველას სახეზე ეტყობა ეს დაზიანებები. მრავალგზის ვთქვი და გავიმეორებ, მოვუწოდებ შინაგან საქმეთა სამინისტროს, მოქალაქეების დაკავების პროცესში არ გადაამეტოს უფლებამოსილებას, ხოლო სპეციალურ საგამოძიებო სამსახურს, ასეთ შემთხვევებზე დროული და ეფექტური რეაგირება ჰქონდეს.

მთელი 4 დღის განმავლობაში, როგორც მე, ისე სახალხო დამცველის წარმომადგენლები დაკავებულებს ვხვდებით, მათგან ინფორმაციას ვიღებთ და შესაბამის ოქმებს ვადგენთ. თუ ვხედავთ, რომ ადგილი სავარაუდო დანაშაულის ჩადენის ფაქტს, პოლიციის მხრიდან უფლებამოსილების გადამეტებას აქვს ადგილი, სპეციალურ საგამოძიებო სამსახურს რეაგირებისთვის ვუგზავნით. შემდეგ ამ გამოძიების ეფექტურობის შეფასებასაც ვახდენთ. შემიძლია ვთქვა, გაზაფხულის აქციებთან დაკავშირებით დაწყებულ გამოძიებებზე, სამწუხაროდ, არანაირი შედეგი არ არის. ეს ყველაფერი საგანგაშოა, როცა გამოძიების მიმდინარეობა კონკრეტულ შედეგს არ იძლევა, უფრო მეტი ჩვენი თანამოქალაქე ზარალდება დაგვიანების მომენტში", — განაცხადა იოსელიანმა.