შინაგან საქმეთა სამინისტროს ცნობით, თბილისში, საქართველოს რკინიგზის ცენტრალურ ოფისთან მიმდინარე აქციაზე, სამი პირი ადმინისტრაციული წესით დააკავეს. როგორც უწყებაში ამბობენ, დამატებით დეტალებს მოგვიანებით გაავრცელებენ.

სტუდენტური მოძრაობა აუდიტორია 115-ის ცნობით, დაკავებულებს შორის ორი – ირაკლი კუპრაძე და ცოტნე ცხვედიანი – მათი წევრია.

"მოვუწოდებთ ხელისუფლებას, დაუყოვნებლივ გაათავისუფლოს დაკავებულები და მთელი ძალისხმევა მიმართოს რკინიგზელთა პრობლემების მოსაგვარებლად, რომლებიც უკვე მე-10 დღეა შიმშილობენ.

მივმართავთ საზოგადოებას, დროა გამოვავლინოთ ყველამ ერთად უპრეცენდენტო სოლიდარობა და ჩავერთოთ მშრომელებთან ერთად ბრძოლაში ჩვენივე უფლებებისთვის!" – აცხადებს აუდიტორია 115.

საქართველოს რკინიგზის გურჯაანში დასაქმებულმა ორმა თანამშრომელმა შიმშილობა 15 აგვისტოს დაიწყო. 17 აგვისტოს გამართულ აქციაზე კიდევ შვიდმა ადამიანმა, მათ შორის, რკინიგზის ახალი პროფკავშირების წევრებმა მიიღეს გადაწყვეტილება, შეერთებოდნენ შიმშილობის აქციას.

აქციის მონაწილეები თავდაპირველად რკინიგზელების ძველ სამუშაო ადგილზე დაბრუნებას, ან ტრანსპორტირებისა და საცხოვრებლის ანაზღაურებას ითხოვდნენ, მოგვიანებით მათ მოთხოვნებს საქართველოს რკინიგზის პრესსამსახურის უფროსის დაჩი ცაგურიას და რკინიგზის ინფრასტრუქტურის დირექტორის ვასილ ხორავას გათავისუფლების მოთხოვნა დაემატა.

24 აგვისტოს საქართველოს რკინიგზასთან მორიგი აქცია დაპირისპირებითა და აქციის მონაწილეთა დაკავებით დასრულდა.

ინციდენტს გამოეხმაურა საქართველოს რკინიგზა. კომპანია მომხდარში პროფკავშირების ხელმძღვანელს ადანაშაულებს: "სამწუხაროდ, ირაკლი პეტრიაშვილი აგრძელებს პროვოკაციების მოწყობას საქართველოს რკინიგზასთან, მათ ვერ შეძლეს საზოგადოების მხარდაჭერის მოპოვება და დღევანდელ აქციაზე, სადაც მხოლოდ მათი აქტივისტები ესწრებოდნენ, სცადეს საქართველოს რკინიგზის შენობაში ძალის გამოყენებით შეჭრა, რაც პოლიციის აქტიური მოქმედებებით აღკვეთილ იქნა".