ცხოველთა სამეფოში გადარჩენის ინსტინქტი და ბუნებრივი იერარქია ხშირად განსაზღვრავს ურთიერთობებს. თუმცა, ხანდახან ბუნება ისეთი გულის ამაჩუყებელი ამბებით გვაოცებს, რომლებიც მისსავე კანონებს ამარცხებს და გვიმტკიცებს, რომ სიყვარულს საზღვრები არ აქვს.

ამ სტატიაში სხვადასხვა ცხოველს შორის ჩამოყალიბებულ გულწრფელ მეგობრობებზე გიამბობთ, რომლებმაც ადამიანებს მთელი მსოფლიოს მასშტაბით გაუთბეს გული და დაგვარწმუნეს, რომ წრფელი ურთიერთობების დამყარება მხოლოდ ჩვენთვის დამახასიათებელი ნიჭი არ არის. ეს ამბები შთაგვაგონებს, ახლებურად გვანახებს ემპათიისა და ნდობის ძალას. მოდი, ერთად გავეცნოთ სამყაროს, სადაც განსხვავებები ცხოველებს აახლოებს:

ტინი და სნიფერი — ნორვეგიელი ძაღლისა და მელიის მეგობრობის ისტორია

მართალია, ძაღლები და მელიები სხვადასხვა სამყაროებში ცხოვრობენ და ერთმანეთს ხშირად მტრობენ ხოლმე, მაგრამ ძაღლი ტინისა და მელია სნიფერის შემთხვევაში პირიქით მოხდა. მათ ერთმანეთი იმ ერთ მშვენიერ დღეს გაიცნეს, როცა ტინის თავისი პატრონი, ფოტოგრაფი ტორგეირ ბერგე ასეირნებდა ნორვეგიის ერთ-ერთ ტყეში.

მათი მეგობრობა გაცნობის წამიდანვე დაიწყო — ტინიმ და სნიფერმა მაშინვე დაიწყეს თამაში და ერთმანეთის დაშავება არც კი უცდიათ. ახლა ისინი ერთმანეთს ყოველდღე ხვდებიან და მრავალ საინტერესო თავგადასავალში ეხვევიან, რომლებსაც ტინის პატრონი კამერით აღბეჭდავს.

ლომი ბოუნდიგერი და ტაქსა მაილო განუყრელი მეგობრები არიან

ვაინვუდდში, ოკლაჰომას შტატში მდებარე ეგზოტიკურ ცხოველთა პარკში მცხოვრები ლომი ბოუნდიგერი 230 კილოგრამს იწონის, მაგრამ ეს პაწაწინა ტაქსასთან მეგობრობაში ხელს მაინც არ უშლის.

ბოუნდიგერი და მაილო მაშინ დამეგობრდნენ, როცა ბოუნდიგერი ჯერ კიდევ ლეკვი იყო. ლომი ძვლის მეტაბოლური დაავადებით დაიბადა, რის გამოც ხეიბრობს. როცა მაილომ შენიშნა, რომ ლომს ჯანმრთელობის პრობლემა ჰქონდა, მისთვის ნუგეშის ცემა და დაცვა მოინდომა, რის შემდეგაც ბოუნდიგერის ნდობა და სიყვარული დაიმსახურა. ახლა ისინი განუყრელი მეგობრები არიან — ერთად თამაშობენ, ჭამენ, ისვენებენ და ერთმანეთს ეხუტებიან კიდეც.

შერე ხანი, ბალუ და ლეო — ზღაპრული მეგობრობის ისტორია

თუ გგონიათ, რომ დათვები, ლომები და ვეფხვები მხოლოდ ზღაპრებში მეგობრობენ, ცდებით — დათვი ბალუს, ვეფხვი შერე ხანისა და ლომი ლეოს მეგობრობის ისტორია ძალიან ემოციურია. ცხოველთა უფლებების დამცველებმა ისინი ნარკოდილერისგან დაიხსნეს, რომელიც მათ გაუსაძლის პირობებში აცხოვრებდა. ბალუს ოპერაციაც კი დასჭირდა, რადგან ჯაჭვი, რომლითაც პატრონს დაბმული ჰყავდა, შეეზარდა. ამ გმირმა ცხოველებმა ერთად მრავალი სირთულე გამოიარეს, ამიტომ ახლა ერთმანეთს არასდროს ტოვებენ. შერე ხანი, ბალუ და ლეო ახლა ამერიკაში, ნოეს კიდობნის ცხოველთა თავშესაფარში ცხოვრობენ და თავს ძალიან ბედნიერად გრძნობენ.

ორანგუტანი სურია და ცუგა როსკო

სურიას და როსკოს ისტორია ერთი ნახვით შეყვარების ჭეშმარიტი მაგალითია. სურია სამხრეთ კაროლინაში მდებარე საფრთხეში მყოფ ცხოველთა ნაკრძალში ცხოვრობდა, როცა ერთ დღეს ტერიტორიას როსკო მოადგა. თურმე, როსკო აქ მომუშავე პერსონალს გამოჰყვა. ნაკრძალში შემოსული ძაღლი სურიამ მალევე შეამჩნია და წამში მასთან გაჩნდა, რადგან მიხვდა, რომ ახალი პარტნიორი გამოუჩნდა.

თავიდან პერსონალს როსკო დაკარგული ეგონათ და მის პატრონს ეძებდნენ, თუმცა მის მოსაკითხად არავინ გამოჩენილა. როგორც ჩანს, როსკოს გულმა თავისი ჭეშმარიტი მეგობრის მოსაძებნად უწევდა და ბედმა სწორ ადგილასაც მოიყვანა — სურია და როსკო ახლა ყოველ დღეს ერთად ატარებენ და უამრავი საერთო ჰობიც აქვთ.

როგორც ხედავთ, მეგობრობა ცხოველებსაც შეუძლიათ, მიუხედავად იმისა, თუ რამდენად განსხვავდებიან ერთმანეთისგან. კარგი გაკვეთილია ადამიანებისთვის, არა?

შინაური ცხოველების მეგობრებს, ძაღლებისა და კატებისთვის საუკეთესო კვებისა და მოვლის შეთავაზებისთვის Petverse ეხმარება. Petverse ოთხფეხა მეგობრების ჰიპერპრემიუმ კლასის იტალიური საკვები ბრენდის, Farmina-სა და აქსესუარებისა და მოვლის საშუალებების ბელგიური ბრენდის, M-Pets-ის, დისტრიბუტორია საქართველოში. Farmina-ს ნუტრიციოლოგთან უფასო კონსულტაციით შეგიძლია შეურჩიო შენს ძაღლსა თუ კატას შესაბამისი საკვები. დაურეკე Farmina-ს ნუტრიციოლოგს ნომერზე: 032 211 20 12 ან ეწვიე Petverse-ის შოურუმს, მის: მერაბ კოსტავას #71.