ვოლოდიმირ ზელენსკის თქმით, უკრაინა მის რომელიმე ოკუპირებულ ტერიტორიას რუსეთის ნაწილად იურიდიულად ვერასდროს აღიარებს. უკრაინის პრეზიდენტმა ამის შესახებ Fox News-თან ინტერვიუში განაცხადა, როდესაც უპასუხა შეკითხვას : მზად არის თუ არა სამშვიდობო შეთანხმების ფარგლებში ტერიტორიის ნაწილის დასათმობად.

"უკრაინის რომელიმე ოკუპირებული ტერიტორიის რუსეთის ნაწილად იურიდიულად აღიარება არ შეგვიძლია. ეს იმ ტერიტორიებს ეხება, რომელთა ოკუპაციაც პუტინმა 2014 წლიდან, უკრაინაში სრულმასშტაბიან შემოჭრამდე განახორციელა. ჩვენ ამას იურიდიულად არ ვაღიარებთ, ჩვენ ამას არ ვღებულობთ", — აღნიშნა ზელენსკიმ.

მისი თქმით, უკრაინა მზადაა, ყირიმი დიპლომატიური გზით დაიბრუნოს.

"მზად ვართ, დიპლომატიური გზით დავიბრუნოთ ყირიმი. ვერ დავკარგავთ ათობით ათას ჩვენს ჯარისკაცს, რომ ყირიმის დაბრუნების გამო დაიღუპონ. გვესმის, რომ ყირიმის დაბრუნება შესაძლებელია დიპლომატიური გზით", — განაცხადა ზელენსკიმ.