საგანგებო სიტუაციების მართვის სამსახურის პრესსამსახურის ინფორმაციით, ბორჯომის რაიონში, წაღვერის ტყეში ხანძრის ძირითადი კერები ლოკალიზებულია. უწყების პრესსამსახური On.ge-სთან საუბრისას აცხადებს, რომ ამ ეტაპზე ადგილზე უკვე მუშაობს შვიდი ვერტმფრენი და ერთი თვითმფრინავი.

"ბორჯომის ხეობაში ხანძრის გავრცელება შეჩერებულია, ცეცხლის არეალი კი საგრძნობლად შემცირებული, თუმცა კვლავ რჩება რამდენიმე კერა", - ვკითხულობთ მთავრობის ადმინისტრაციის მიერ გავრცელებულ განცხადებაში.

უწყების ინფორმაციით, მთელი ღამის მანძილზე ხეობაში საგანგებო რეჟიმში მუშაობდნენ სახანძრო-სამაშველო ბრიგადები, ეროვნული სატყეო სააგენტოს თანამშრომლები, შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლები. გარდა ამისა, შეუჩერებლად მუშაობდა მძიმე ტექნიკა.

მთავრობის ადმინისტრაციაში აცხადებენ, რომ სტიქიის ზონაში არიან 95 მეხანძრე-მაშველი აზერბაიჯანიდან და 70-მდე მეხანძრე-მაშველი სომხეთიდან, რომლებიც ქართველ მეხანძრეებს დაეხმარებიან. გარდა ამისა, ხანძრის ლიკვიდაციაში ჩართულია აზერბაიჯანიდან და სომხეთიდან გამოგზავნილი მძიმე ტექნიკაც.

წაღვერის ტყეში ხანძარი 20 აგვისტოს გაჩნდა და მას მერე ვერ ჩააქრეს. როგორც საგანგებო სიტუაციების მართვის სამსახურში ამბობენ, სამუშაოებში ხელს ხანძრის კერებთან მიუდგომელი ადგილები და ქარი უშლიდათ.