Ekho Kavkaza-ს ცნობით, ოკუპირებული აფხაზეთის ე.წ. კონსტიტუციის თანახმად, "ვადამდელი საპრეზიდენტო არჩევნები" სამთვიან ვადაში უნდა გაიმართოს. აფხაზეთის ე.წ ცენტრალური საარჩევნო კომისიის წევრი ამბობს, რომ "არჩევნები" 2025 წლის 15 ან 16 თებერვალს ჩატარდება.

ე.წ ცენტრალური საარჩევნო კომისიის ხელმძღვანელმა აღნიშნა, რომ "არჩევნებისათვის" მომზადება დაიწყება, როგორც კი თარიღს ე.წ პარლამენტი დაადასტურებს.

შეგახსენებთ, რომ სოხუმში ვითარება 15 ნოემბერს დაიძაბა. ადგილობრივი ოპოზიციის წარმომადგენლები და მათი მხარდამჭერები დე ფაქტო პრეზიდენტის ადმინისტრაციის და დე ფაქტო პარლამენტის შენობებში შეიჭრნენ და ე.წ. პრეზიდენტის, ასლან ბჟანიას გადადგომა მოითხოვეს.

15 ნოემბერს დე ფაქტო პარლამენტს უნდა განეხილა ადგილობრივი ოპოზიციის და საზოგადოების ნაწილის პროტესტის გამომწვევი, ე.წ. რუსეთ-აფხაზეთის საინვესტიციო შეთანხმების რატიფიკაციის საკითხი. ეს შეთანხმება რუსულ კომპანიებს აფხაზეთში საინვესტიციო პროექტების განხორციელების შესაძლებლობას და არაერთ შეღავათს აძლევს.