რუსული მედიის მიერ გავრცელებული ინფორმაციით, აშშ-ის საელჩოს შემდეგ, საჰაერო საფრთხის გამო კიევში საელჩო ესპანეთმა, იტალიამ და საბერძნეთმაც დროებით დახურეს.

როგორც ესპანეთის საელჩო იუწყება, "უკრაინის ტერიტორიაზე საჰაერო თავდასხმების გაზრდილი რისკის გამო" დღეს, 20 ნოემბერს საელჩო დაიხურება.

ამასთან, ესპანეთის საელჩო მოუწოდებს უკრაინაში მცხოვრებ ესპანელ მოქალაქეებს, რომ "უსაფრთხოების ზომები მიიღონ, ადგილობრივი ხელისუფლების მითითებებს მიჰყვნენ და დარწმუნდნენ, რომ თავშესაფართან ახლოს არიან".

კიევში თავიანთი საელჩოების დახურვის შესახებ იტალიამ და საბერძნეთმაც განაცხადეს.

შეგახსენებთ, რომ მანამდე, საჰაერო საფრთხის გამო აშშ-მა კიევში საელჩო ერთი დღით დახურა და უკრაინაში მცხოვრებ ამერიკის მოქალაქეებს მოუწოდა, რომ "მზად იყვნენ იმისთვის, რომ საჰაერო განგაშის შემთხვევაში სასწრაფოდ თავშესაფრებში ჩავიდნენ".