შსს-მ ზუსტად 1 საათის წინ გაავრცელა განცხადება, სადაც აქციის მონაწილეებს 15-წუთიანი ვადა მისცა გადაკეტილი ჭავჭავაძის გამზირის გასათავისუფლებლად. მათი თქმით ადგილზე არ იყო საკმარისი რაოდენობის ხალხი, რომ გზის გადაკეტვის საჭიროება ყოფილიყო.

"შეკრებებისა და მანიფესტაციების შესახებ საქართველოს კანონის მე-11 პრიმა მუხლის თანახმად, დაუშვებელია ტრანსპორტის სავალი ნაწილის ნაწილობრივ ან სრულად გადაკეტვა, თუ აღნიშნულის საჭიროებას არ განაპირობებს მონაწილეთა რაოდენობა.

ამჟამად ჭავჭავაძის გამზირზე აქციაზე მყოფ პირთა რაოდენობა არ მოითხოვს გზის სავალი ნაწილის გადაკეტვას.

აქციის ორგანიზატორებსა და მონაწილეებს მოვუწოდებთ გაათავისუფლონ გზა და შეწყვიტონ ტრანსპორტის სავალ ნაწილზე შეკრება/მანიფესტაცია და პროტესტი გამოხატონ კანონით დადგენილ ფარგლებში.

შეკრებებისა და მანიფესტაციების შესახებ საქართველოს კანონის მე-13 მუხლის თანახმად შეკრება/მანიფესტაციების ორგანიზატორებსა და მონაწილეებს ეძლევათ 15 წუთიანი ვადა, რათა მიმართონ ყველა შესაბამის ზომას ტრანსპორტის სავალი ნაწილის გახსნისა და ტრანსპორტის მოძრაობის აღსადგენად. წინააღმდეგ შემთხვევაში, 15 წუთიანი ვადის გასვლის შემდეგ, თუ არ გაიხსნება ტრანსპორტის სავალი ნაწილი, შინაგან საქმეთა სამინისტრო კანონით მისთვის მინიჭებული მანდატის ფარგლებში იმოქმედებს და მიიღებს საქართველოს კანონმდებლობით გათვალისწინებულ ზომებს.

შეკრება/მანიფესტაციის ორგანიზატორებსა და მონაწილეებს მოვუწოდებთ დაემორჩილონ პოლიციის კანონიერ მოთხოვნას", — ნათქვამია შსს-ს განცხადებაში.

პარალელურად ადგილზე დიდი რაოდენობით პოლიცია იყო მობილიზებული და 15-წუთიანი ვადის გასვლის სამართალდამცავებმა ტერიტორიის აქციის მონაწილეებისგან და კარვებისგან გათავისუფლება დაიწყეს.

კოალიცია ცვლილებებისთვის ლიდერმა, ზურა გირჩი ჯაფარიძემ განაცხადა, რომ ძალოვნებთან ჩხუბს არ აპირებენ და მშვიდობიანად მელიქიშვილის გამზირისკენ გადაინაცვლებენ.

"არანაირი ინტერესი არ გვაქვს ამათთან ხელჩართულ ჩხუბში ჩავებათ, ამიტომ გადავიწევით მელიქიშვილზე. თუ მოვლენ, კიდევ გადავიწევით, დღეს დილით რაც გავაკეთეთ, იმავეს გავაკეთებთ, მოვლენ - კიდევ გავიწევით. მერე რას შვრებიან?", — განაცხადა ჯაფარიძემ.

ამ დროისთვის აქციის მონაწილეები მელიქიშვილის გამზირზე არიან. დემონსტრანტებთან ერთად მელიქიშვილის გამზირზე გადავიდა სამართალდამცველთა ნაწილიც.