თურქეთიდან გამოგზავნილი ვერტმფრენები უკვე ბორჯომის ხეობაში არიან, თუმცა წაღვერის ტყის ხანძარსაწინააღმდეგო სამუშაოებში ჯერ არ ჩართულან. ამის შესახებ On.ge-ს საგანგებო სიტუაციების მართვის სამსახურის პრესსამსახურში განუცხადეს.

რეგიონული განვითარებისა და ინფრასტრუქტურის მინისტრმა, ზურაბ ალავიძემ განაცხადა, რომ არც თურქეთის ვერტმფრენებს შეუძლიათ ღამით ხანძარსაწინააღმდეგო საქმიანობაში ჩართვა.

საგანგებო შტაბის განცხადებით, ბორჯომის ხეობაში, ტყის მასივში ხანძრის ლოკალიზების პროცესში, ამ დროისთვის, 3 ვერტმფრენი, 400-მდე მეხანძრე-მაშველი, 100-ზე მეტი ტყის მცველი, შსს-ს განსაკუთრებულ დავალებათა დეპარტამენტის 500 თანამშრომელი და ათეულობით მძიმე ტექნიკაა ჩართული, რომელთა მობილიზებაც საქართველოს სხვადასხვა რეგიონიდან განხორციელდა.

წაღვერის ტყეში ხანძარი უკვე მესამე დღეა, რაც არის. როგორც საგანგებო სიტუაციების მართვის სამსახურში ამბობენ, ლოკალიზებული კერები ქარის გამო კვლავ ღვივდება.