რუსეთის პრეზიდენტმა, ვლადიმერ პუტინმა ხელი მოაწერა ბირთვული შეკავების სფეროში სახელმწიფო პოლიტიკის საფუძვლებს, სადაც ნათქვამია, რომ რუსეთს შეუძლია გამოიყენოს ბირთვული იარაღი, თუ საფრთხე დაემუქრება რუსეთისა და ბელორუსის სუვერენიტეტსა და მთლიანობას,— ინფორმაციას რუსული მედია ავრცელებს. შესაბამისი განკარგულება იურიდიული ინფორმაციის ოფიციალურ ინტერნეტ-პორტალზე გამოქვეყნდა.

დოკუმენტი სახელწოდებით "რუსეთის ფედერაციის სახელმწიფო პოლიტიკის საფუძვლები ბირთვული შეკავების სფეროში" შეიცავს 26 პუნქტს.

განახლებულ დოქტრინაში ნათქვამია, რომ რუსეთი იტოვებს უფლებას გამოიყენოს ბირთვული იარაღი, თუ მისი მოკავშირეები მასობრივი განადგურების იარაღს გამოიყენებენ, ასევე რუსეთის ფედერაციისა და ბელორუსის წინააღმდეგ აგრესიის შემთხვევაში, თუ კრიტიკული საფრთხე შეექმნება ამ ქვეყნების სუვერენიტეტს და ტერიტორიული მთლიანობა.

დოკუმენტის მიხედვით, სამხედრო კოალიციის ნებისმიერი წევრი სახელმწიფოს აგრესია რუსეთის ან მისი მოკავშირეების წინააღმდეგ განიხილება, როგორც მთლიანი კოალიციის აგრესია.

ბირთვული იარაღის გამოყენების პირობებია რუსეთისა და მისი მოკავშირეების თავდასხმა ბალისტიკური რაკეტებით (საშუალო და მოკლე დიაპაზონი); მტრის მიერ მასობრივი განადგურების იარაღის გამოყენება რუსეთისა და მისი მოკავშირეების წინააღმდეგ; მტრის გავლენა რუსეთის ფედერაციის კრიტიკულ სამთავრობო ან სამხედრო ობიექტებზე; სანდო ინფორმაციის მიღება საჰაერო კოსმოსური თავდასხმის იარაღის მასიური აფრენისა და რუსეთის საზღვრის გადაკვეთის შესახებ.

ბირთვული იარაღის გამოყენების გადაწყვეტილებას იღებს რუსეთის პრეზიდენტი.