"ქართული ოცნება ქართულ კოშმარად გადაიქცა", — ამის შესახებ ევროპარლამენტარმა, ნატალი ლუაზომ საქართველოში ჩატარებული არჩევნების შესახებ ევროპარლამენტში გამართულ დებატებზე განაცხადა.

ევროპარლამენტარი აცხადებს, რომ საქართველოს მმართველი პარტიის წევრები ვლადიმერ პუტინისკენ მიბრუნდნენ და ოპოზიციური პარტიების აკრძალვა სურთ. დღევანდელ გამოსვლაში ნატალი ლუაზომ კიდევ ერთხელ ისაუბრა საქართველოში ჩატარებულ საპარლამენტო არჩევნებზე და აღნიშნა, რომ არჩევნების გაყალბების ინსტრუმენტების სრული ნაკრები იყო წარმოდგენილი.

"იყო დაშინება, პირადობის მოწმობების ჩამორთმევა, ეს არის არჩევნების გაყალბების ინსტრუმენტების სრული ნაკრები, რომელიც მე ვნახე საქართველოში, როდესაც არჩევნების სადამკვირვებლო მისიის ნაწილი ვიყავი. ამას საპროტესტო აქციები მოჰყვა, როდესაც საქართველოს მოსახლეობა ქუჩებში გამოვიდა, ისინი ამბობდნენ, რომ მათ არჩევნები მოჰპარეს. ისინი ქართულ და ევროპულ დროშებს აფრიალებენ. მათ სჯერათ ჩვენი და იმედოვნებენ, რომ მათ არ მივატოვებთ. ქართული ოცნება ქართულ კოშმარად გადაიქცა, ვლადიმერ პუტინისკენ მიბრუნდნენ და ოპოზიციური პარტიების აკრძალვა სურთ“, — განაცხადა ნატალი ლუაზომ.

მისივე თქმით, ახლა ევროპული რეაქცია ძლიერია, მაგრამ ეს არ არის საკმარისი. მისი განცხადებით, დასავლეთმა უნდა დაუჭიროს ქართველ ხალხს მხარი.

"ჩვენ ხალხს იმედი უნდა მივცეთ, მხარს დავუჭიროთ მათ, ვინც დამოუკიდებლობისთვის ბრძოლას აგრძელებს. მე მათი პრეზიდენტის გამბედაობას მივესალმები. ჩვენ უნდა უზრუნველვყოთ, რომ ისინი არა ჩვენი სისუსტის, არამედ ჩვენი სიმტკიცის სიმბოლოები იყვნენ", — აღნიშნა ევროპარლამენტარმა.