ლიეტუვის პრეზიდენტმა, გიტანას ნაუსედამ ევროკავშირის წევრი ქვეყნების ლიდერების არაფორმალური შეხვედრის დაწყებამზე ჟურნალისტებთან საქართველოს არჩევნების საკითხზე დასმულ კითხვას უპასუხა და თქვა, რომ "იმედგაცრუებულია" არა მხოლოდ არჩვნების შედეგებით, არამედ "უამრავი დარღვევით საარჩევნო პროცესში".

როგორც იგი ამბობს, არ შეიძლება ერთდროულად ევროკავშირში გაწევრიანების მისწრაფებებზე საუბრობდე და ამავდროულად დააწესო საწინააღმდეგო კანონები, მიიღო ზომები და დემოკრატიული დასავლეთის წინააღმდეგ გამოიყენო შეურაცხმყოფელი რიტორიკა.

მანვე აღნიშნა, რომ საარჩევნო პროცესის საერთაშორისო, დამოუკიდებელი გამოძიებაა საჭიროა.

"არ მჯერა, რომ ქართულ ინსტიტუტებს ამის გაკეთება შეუძლიათ. ძალიან გულუბრყვილო იქნება იმის დაჯერება, რომ მათ ეს შეუძლიათ. ვფიქრობ, საჭიროა საერთაშორისო დამოუკიდებელი გამოძიება პროცესში. საარჩევნო პროცესში რუსეთის ჩარევის მასშტაბი და ინტენსიურობა ისეთი დიდი იყო, როგორც არასდროს და ეს არის შეშფოთების საკითხი. მე არ ვსაუბრობ მხოლოდ საქართველოზე, მე ვსაუბრობ მოლდოვაზეც, მაგრამ მოლდოვაში არჩევნებს შედეგი განსხვავებული იყო", — აღნიშნა ლიეტუვის პრეზიდენტმა.

ამასთან, მან უპასუხა ჟურნალისტის კითხვას, იმაზე თუ რა იქნება ევროკავშირის პასუხი საქართველოს მიმართ:

"საკმარისია მკაფიო სიგნალის გაგზავნა: მეგობრებო, თუ ამას აკეთებთ, არ უნდა ელოდოთ, რომ ევროკავშირს მიუახლოვდებით. თქვენ საპირისპირო მიმართულებით მოძრაობთ, სცილდებით ევროკავშირს. ვფიქრობ, ეს სიგნალი მიღებული და გაგებული უნდა იქნას და იმედი მაქვს, საქართველოს ჯერ კიდევ შეუძლია, შეცვალოს კურსი, მაგრამ ამ დროისთვის ვერ ვხედავ დიდ ალბათობას, რომ ეს უახლოეს მომავალში მოხდება", — აღნიშნა ნაუსედამ.

მას დაუსვეს კითხვა, მოახერხებს თუ არა ქართველი ხალხი ევროკავშირის მიმართულებით მოძრაობას, ბიძინა ივანიშვილის ოლიგარქიული რეჟიმის პირობებში::

"რასაკვირველია, ყველა პროცესის უკან ეს პიროვნება დგას და ვხედავთ, რამდენად ღრმა და ინტენსიურია რუსეთის ფედერაციასთან ურთიერთობები. ეს არის იმის მიზეზი, რომ ჩვენ ვსაუბრობთ არა მხოლოდ ევროკავშირთან დაშორებაზე, არამედ ასევე რუსეთის ფედერაციასთან მიახლოებაზე. შუა გზას ვერ აირჩევთ : მიდიხართ დასავლეთისკენ, ან აღმოსავლეთისკენ", — აღნიშნა ნაუსედამ.