ოპოზიციის ლიდერების გადაწყვეტილებით, თბილისის სააპელაციო სასამართლოში აქცია ხვალ, 6 ნოემბერს 11:00 საათზე გაიმართება. 12:00 საათიდან კი საარჩევნო დავებზე სასამართლო პროცესია დანიშნული.

დღეს ცნობილი გახდა, რომ თბილისისა და ქუთაისის სააპელაციო სასამართლოებში საიას დავები გააერთიანეს და მათი განხილვები გადადეს. საიას თავმჯდომარე, ნონა ქურდოვანიძის ინფორმაციით, თბილისის სააპელაციო სასამართლოში საიას დავების განსახილველი სხდომა ხვალ ჩატარდება, ქუთაისის სააპელაციო სასამართლოში — დღეს, 16:00-ზე.

კოალიცია ცვლილებებისთვის ერთ-ერთმა ლიდერმა ზურა გირჩი ჯაფარიძემ სააპელაციო სასამართლოსთან გამართულ აქციაზე განაცხადა, რომ სხვადასხვა მოსამართლეს რომ დააწერონ დავის განხილვები, ეშინიათ, შეიძლება სადღაც კიდევ "აუფეთქდეთ", ამიტომ ყველას ერთ მოსამართლეს დააწერენ, რომელიც უზით ჯიბეში და რომელიც იმ გადაწყვეტილებას მიიღებს, რომელიც აწყობთ.

შეგახსენებთ, რომ 4 ნოემბერს თეთრიწყაროს სასამართლომ ხმის ფარულობის დარღვევა დაადასტურა და მოსამართლე ვლადიმერ ხუჭუამ საიას სარჩელი დააკმაყოფილა, რაც ახალ პრეცედენტს ქმნის ამომრჩევლის ხმის ფარულობის უფლების დაცვასთან მიმართულებაში.

სასამართლოს მიერ შემთხვევითი შერჩევით შემოწმდა წალკისა და თეთრიწყაროს ოლქში რამდენიმე უბნის ბიულეტენი, სადაც დადასტურდა, რომ ბიულეტენების უკანა მხარეს მარკერის კვალი ხილვადია, რაც არღვევს ხმის ფარულობის უფლებას. მოსამართლემ, რომელიც თავად ჩაატარა შემოწმების პროცესი, დააფიქსირა ხმის მთვლელ აპარატში ბიულეტენის მოთავსებისას ფარულობის დარღვევის აშკარა ფაქტი.