შეერთებული შტატების პრეზიდენტის, ჯო ბაიდენის მოწოდებას, რომ საქართველოს ხელისუფლებამ ყველა საარჩევნო დარღვევა უნდა გამოიძიოს, შტატების სახელმწიფო დეპარტამენტის პრესსპიკერი, მეთიუ მილერიც გამოეხმაურა.

მილერის თქმით, შტატების პრეზიდენტის გუშინდელი, 29 ოქტომბრის განცხადება მხოლოდ იმას ნიშნავდა, რაც მან თქვა და სხვა არაფერს.

ამასთან, შტატების პრესსპიკერმა განაცხადა, რომ ევროკავშირში კოლეგებთან კონსულტაციებს გადიან, იმის თაობაზე, თუ სხვა რა გამოძიებები შეიძლება იყოს სათანადო.

"ჩვენ, ასევე ცხადი გავხადეთ, რომ კონსულტაციებს გავდივართ ჩვენს კოლეგებთან ევროკავშირში იმაზე, თუ სხვა რა გამოძიებები შეიძლება იყოს სათანადო.

პრეზიდენტი [სალომე ზურაბიშვილი] თავად ისაუბრებს თავის თავზე, მაგრამ როგორც მესმის, მან თქვა, რომ აქვს ინფორმაცია [საარჩევნო] დარღვევების შესახებ, ასე რომ, იმედი მაქვს, ის გააზიარებს ამ ინფორმაციას. ის რელევანტური იქნება ნებისმიერი გამოძიებისთვის, მიუხედავად იმისა, მას საქართველოს ოფიციალური პირები ატარებენ თუ ნებისმიერი სხვა”, — აღნიშნა მილერმა.

შეგახსენებთ, რომ გუშინ, აშშ-ის პრეზიდენტმა ჯო ბაიდენმა დაგმო 26 ოქტომბერს საქართველოში გამართული საპარლამენტო არჩევნები და საქართველოს ხელისუფლებას მოუწოდა ყველა საარჩევნო დარღვევის გამოძიებისკენ.

მოგვიანებით თბილისის მერმა, კახა კალაძემ შტატების პრეზიდენტის განცხადებასთან დაკავშირებით კომენტარი გააკეთა და თქვა, რომ "ჯო ბაიდენი ვერ იქნება არჩევნების შემფასებელი, ასევე იმის, ხელისუფლება ლეგიტიმურია, თუ — არა".