ქართული ოცნების თბილისის მერობის კანდიდატის, კახა კალაძის განცხადებით, დაუშვებელია ჭავჭავაძის 82-ში მწვანე ნარგავების მოჭრა:

"ჩვენმა ხელისუფლებამ ბიზნესი გაათავისუფლა პოლიტიკური წნეხისგან, რაც არ ნიშნავს, რომ ბიზნესის განვითარება ხეების ჩეხვის, ქალაქის დასახიჩრებისა და ჩვენი შვილების ჯანმრთელობის ხარჯზე უნდა ხდებოდეს".

კალაძე ამბობს, რომ თბილისის მერიამ შესაბამისი ზომები უნდა მიიღოს მსგავსი პრობლემების აღმოსაფხვრელად:

"დღევანდელი ფაქტი აუცილებლად უნდა შეისწავლონ, რათა პასუხი გაეცეს საზოგადოების კითხვებს. მომხდარი ცხადყოფს, რომ საჭიროა გამკაცრდეს და დაიხვეწოს კანონმდებლობით გათვალისწინებული პროცედურები, რათა ჩვენი ქალაქი რეალურად იყოს დაცული მსგავსი ფაქტებისგან".

დღეს, 17 აგვისტოს ბაგებში მშენებლობის გამო 10-მდე საღი ხე მოიჭრა. თბილისის მერიის მტკიცებით, ნებართვა გაიცა 8 ხის მოჭრაზე და კომპანია იღებს ვალდებულებას, მოჭრილი ხეების სანაცვლოდ, დარგოს ხეები და მოაწყოს მწვანე სივრცე. მერობის კანდიდატის, ალეკო ელისაშვილის მონაცემებით, უკვე მოჭრილია 9 ჯანსაღი ხე, ხოლო ნებართვა გაცემულია 15 ხის მოჭრაზე.

2016 წლის პირველ სექტემბერს თბილისის მერმა დავით ნარმანიამ ხეების მოჭრასთან დაკავშირებით მორატორიუმი გამოაცხადა. ნარმასია ამბობდა, რომ მორატორიუმი გაგრძელდებოდა მანამ, ვიდრე ხეების მოჭრასთან დაკავშირებით ახალი რეგულაციები არ იქნებოდა შემოღებული. პარტიზანული მებაღეობის იურისტი ვახტანგ სახოკია მერიაში განცხადების შესატანად მივიდა, რომელიც აღნიშნული მორატორიუმის დარღვევას უკავშირდებოდა. ამასთან, სახოკია მერიაში მანამ არ შეუშვეს, სანამ იურისტმა პატრული არ გამოიძახა.