ისრაელის პარლამენტის წევრებმა კანონპროექტი დაამტკიცეს, რომელიც ფაქტობრივად, პალესტინელი ლტოლვილების დახმარების სააგენტოს (UNRWA) საქმიანობას კრძალავს ისრაელის ტერიტორიაზე. ამ საკითხს საერთაშორისო საზოგადოების ფართო წინააღმდეგობა მოჰყვა, თუმცა ამის მიუხედავად კანონპროექტი 92 ხმით დაამტკიცეს ათის წინააღმდეგ.

ისრაელის თქმით პალესტინელი ლტოლვილების დახმარების სააგენტოს თანამშრომელთა ათ პროცენტზე მეტს ტერორიზმთან აქვს კავშირი, ხოლო ორგანიზაციის დაქვემდებარებაში მყოფი საგანმანათლებლო დაწესებულებები ისრაელის მიმართ სიძულვილს მუდმივად აღვივებენ.

ამასთან, ადგილობრივი მედია წერს, რომ ისრაელის თავდაცვის ძალებმა ჰამასის საბრძოლო ცენტრებსა და მებრძოლებს არაერთხელ დაარტყეს, რომლების პალესტინელი ლტოლვილების დახმარების სააგენტოს სკოლებში იმალებოდნენ.

კანონპროექტი დამტკიცებამდე გაეროს გენერალურმა მდივანმა, ანტონიუ გუტერეშმა გააკრიტიკა, ხოლო ევროკავშირის უმაღლესმა წარმომადგენელმა, ჯოზეფ ბორელმა ხაზგასმით თქვა, რომ კანონს "კატასტროფული შედეგები" ექნება.

კანონპროექტს კრიტიკული გამოხმაურება აშშ-ის სახელმწიფო მდივნის, ენტონი ბლინკენისა და თავდაცვის მდივნის, ლოიდ ოსტინისგანაც მოჰყვა. შტატებში აღიარეს, რომ სააგენტომ ღაზას სექტორში ჰუმანიტარული დახმარების გავრცელებაში კრიტიკული როლი ითამაშა.