28 ოქტომბერს თბილისში, პარლამენტის მიმდებარე ტერიტორიაზე ფართომასშტაბიანი საპროტესტო აქცია ჩატარდა, რომელიც საპარლამენტო არჩევნების მომდევნო დღეს, 27 ოქტომბერს საქართველოს პრეზიდენტმა, სალომე ზურაბიშვილმა დააანონსა.

მოქალაქეებმა საპარლამენტო არჩევნების გაყალბება გააპროტესტეს და პოლიტიკოსებთან ერთად კონკრეტული მოთხოვნები გააჟღერეს.

ხელახალი არჩევნების ჩატარება

აქციის მთავარი მოთხოვნა ხელახალი, სამართლიანი არჩევნების ჩატარებაა, რომლის დემოკრატიულობაშიც ეჭვი არავის შეეპარება. კოალიცია ერთიანობა — ნაციონალური მოძრაობის ერთ-ერთი ლიდერის განცხადებით, ახალი არჩევნები საერთაშორისო საარჩევნო ადმინისტრაციამ უნდა ჩაატაროს.

ჟურნალისტებთან კომენტარი გააკეთა გახარია — საქართველოსთვის ლიდერმა, გიორგი გახარიამაც, თუმცა ის სცენაზე არ გამოჩენილა. მთავარ მოთხოვნად მანაც ხელახალი არჩევნები დაასახელა.

"თავარი მოთხოვნა არის თავისუფალი, სამართლიანი და დემოკრატიული არჩევნები, რომელიც ქვეყანას მიეხმარება ევროპულ გზაზე გაწევრიანებაში და არა ხელს შეუშლის", — განაცხადა გიორგი გახარიამ.

გაყალბებულ არჩევნებთან დაკავშირებით გამოძიების ჩატარება

აქციის ერთ-ერთი მოთხოვნა ეხმიანებოდა საერთაშორისო სადამკვირვებლო ორგანიზაციებისა და უცხოელი პოლიტიკური ფიგურების მოთხოვნას, რომლებმაც მოუწოდეს საქართველოს ხელისუფლებას, გამოიძიოს საარჩევნო დარღვევები. ეს მოთხოვნა საქართველოს პრეზიდენტმაც გააჟღერა:

"არავინ აღიარებს არსებულ არჩევნებს, მაგრამ ყველა გვეუბნება, რომ ჩვენ უნდა გავაგრძელოთ გამოძიება და ბოლომდე მივიყვანოთ. შესაძლოა, ამაში მივიღოთ საერთაშორისო მხარდაჭერა, რომ ეს გამოძიება იყოს სრულყოფილი და არ დავტოვოთ არცერთი კითხვა პასუხის გარეშე. ამაში არიან ძალიან აქტიურად ჩართულები ჩვენი სადამკვირვებლო ორგანიზაციები, ჩვენი არასამთავრობო ორგანიზაციები და პოლიტიკური პარტიები. ყველანი ერთად, თქვენი დახმარებით, თქვენც გაქვთ ხელთ ბევრი მტკიცებულება, რომ შევქმნათ სრული სურათი თუ როგორ მოხდა ის უნახავი, უპრეცედენტო, უნიკალური ხმების წართმევა, ასე მასობრივად, სისტემურად. ეს არის წინასწარ დაგეგმილი უზარმაზარი ოპერაცია, რომელმაც წაგვართვა ჩვენი ხმები, წაგვართვა პარლამენტი, წაგვართვა კონსტიტუცია, მაგრამ ჯერ კიდევ უნდა ვიმუშაოთ იმაზე, რომ დავდოთ ეს შედეგები და მოვითხოვოთ ამ შედეგების შესრულება. ეს არის პირველი ეტაპი", — განაცხადა სალომე ზურაბიშვილმა.

არჩევნებში მონაწილე პირების სიის 24 საათში გამოქვეყნება

კოალიცია ძლიერი საქართველოს ერთ-ერთმა ლიდერმა, ანა ნაცვლიშვილმა მესამე მოთხოვნა გააჟღერა. მისი თქმით, შეგროვებულია საარჩევნო დარღვევების შესახებ მტკიცებულებები, ასევე, არსებობს სიები, რომელთა გასაჯაროებასაც ოპოზიცია მოითხოვს, ხოლო თუ ეს მოთხოვნა არ შესრულდება ეს მხოლოდ კიდევ ერთი მტკიცებულება იქნება.

"გაშიფრული გვაქვს ის სქემა, რომლითაც არჩევნები მიიტაცეს და ერთ-ერთი შავი ყუთი, რომელიც ატარებს უტყუარ მტკიცებულებებს მიტაცებული არჩევნების, არის სიები, რომლის გასაჯაროებასაც ჩვენ მოვითხოვთ 24 საათში. თუ არაფერი გაქვთ დასამალი, მაშინ ამ სიებს თქვენ გაასაჯაროებთ, ხოლო თუ ამ სიებს 24 საათში არ გაასაჯაროებთ, დაემატება იმ დიდ დასტას მტკიცებულებების, რომელიც ჩვენ შეგროვილი გვაქვს თქვენი დანაშაულის სამხილებლად და ყველა საერთაშორისო პლატფორმას გამოვიყენებთ იმისთვის, რომ ქართველი ხალხის სიმართლე დამტკიცდეს", — განაცხადა ანა ნაცვლიშვილმა.

ყოფილი პრეზიდენტის, გიორგი მარგველაშვილის თქმით სამოქმედო გეგმა გულისხმობს მშვიდობიანი სამოქალაქო პროტესტის გაგრძელებას, ოპოზიციის კონსოლიდაციას, საერთაშორისო პარტნიორებთან თანამშრომლობასა და მონაცემების დამუშავებას საგამოძიებო მიზნებისთვის.