ჰელსინკის კომისიის თავმჯდომარე, ჯო უილსონი, ფინანსთა სამინისტროს საგამოძიებო სამსახურის მიერ Atlantic Counsil-ის თანამშრომლების, სოფო გელავასა და ეთო ბუზიაშვილის, ბინების ჩხრეკას გამოეხმაურა.

"დამწუხარებული და შეშფოთებული ვარ ეთო ბუზიაშვილისა და სოფო გელავას სახლებში მთავრობის რეიდების შესახებ ინფორმაციის გაგებით. ისინი ატლანტიკური საბჭოს მკვლევრები არიან, რომლებიც დაუღალავად მუშაობენ რუსული დეზინფორმაციის გამოსააშკარავებლად და საქართველოს სუვერენიტეტის გასაძლიერებლად. როგორც გავიგე, მთავრობამ მათი ელექტრონული მოწყობილობები წაიღო, მათ შორის, ქალბატონი გელავას შვილის კომპიუტერიც. მე უპირობოდ ვგმობ ამ რეიდებს. ის, რომ ეს მნიშვნელოვან ეროვნულ არჩევნებამდე ორი დღით ადრე მოხდა განსაკუთრებით შემაშფოთებელია. მე მჯერა, რომ რეიდებს არ ექნება სხვა შედეგი, გარდა იმის დამტკიცებისა, რომ ქალბატონი ბუზიაშვილი და ქალბატონი გელავა ქვეყნის პატრიოტები არიან. პასუხისმგებლობა უნდა დაეკისროთ ფინანსთა სამინისტროს საგამოძიებო დეპარტამენტში მათ, ვინც საკუთარი უფლებამოსილება აშკარად ბოროტად გამოიყენა", — ვკითხულობთ X-ზე გამოქვეყნებულ პოსტში.