1995-97 წლებში საქართველოში აშშ-ის ელჩის, უილიამ კორტნის განცხადებით, ოფიციალური ვაშინგტონის რეაქცია საქართველოს არჩევნების შედეგებზე მრავალ ფაქტორზე იქნება დამოკიდებული. კორტნის თქმით, შეერთებული შტატები გაყალბებულ არჩევნებზე მსოფლიოში სხვადასხვაგვარად, კონტექსტის გათვალისწინებით რეაგირებდა.

"არა მგონია, რომ ვინმე დასავლეთში თავისუფალ და სამართლიან არჩევნებს მოელის იმის გათვალისწინებით, რა ნაკლოვანებებიც საერთაშორისო გამჭვირვალობამ გამოყო. საკონსტიტუციო უმრავლესობა, რისი იმედიც აქვს მმართველ პარტიას, მხოლოდ ფართომასშტაბიანი ქურდობით იქნება შესაძლებელი. ბატონმა ივანიშვილმა თქვა, რომ არჩევნების შემდეგ ნებისმიერ ფასად გააუქმებს ოპოზიციას და ქართულ ნიურნბერგის სასამართლო პროცესის გამართვას აანონსებს. ეს საკმაოდ საშიშია. ჩვენ ლუკაშენკოსგან არ გვინახავს ასეთი საუბარი", — განაცხადა კორტნიმ American Enterprise Institute-ის ორგანიზებულ დისკუსიაზე.

კორტნიმ აღნიშნა, რომ ქართულ ოცნებას იგივე დაემართა, რაც სხვა ხელისუფლებებს ყოფილ საბჭოთა სივრცეში, როდესაც რეფორმისტი მთავრობები ხელისუფლებაში ძალიან დიდი ხნის განმავლობაში ყოფნის შემდეგ უკუსვლას იწყებენ.