ჩვენ პარტია ხალხისთვის ვწყვეტთ ნებისმიერი სახის თანამშრომლობას დავით ფერაძესთან, მანამ სანამ არ დასრულდება გამოძიება და არ დადგინდება სიმართლე, — ამის შესახებ პარტია ხალხისთვის მიერ გავრცელებულ განცხადებაშია ნათქვამია, სადაც პარტია მედიაში გავრცელებულ ინფორმაციას ეხმაურება იმის შესახებ, რომ ტრანსგენდერ ქალ, ნატა ტალიკაშვილზე თავდასხმისთვის დაკავებული პარტია ლელოს წევრი დავით ფერაძეა.

მოგვიანებით გავრცელდა ინფორმაცია, რომ ძალადობაზე დაკავებული არა პარტია ლელოს, არამედ პარტია ხალხისთვის წევრია.

დღეს ანა დოლიძის პარტიის, ხალხისთვის განცხადებაში ნათქვამია, რომ დავით ფერაძემ ერთი თვის წინ, მისი ნებით დატოვა პარტია.

"ქართული ოცნება დიდი ხანია საფრთხეს ხედავს ძლიერი საქართველოს კოალიციაში, რომელიც წარმოადგენს ხელისუფლების რეალურ ალტერნატივას. ბიძინა ივანიშვილის ბოლო ინტერვიუს შემდეგ ეს დამოკიდებულება კიდევ უფრო ცხადი გახდა. შესაბამისად, გასაგებია რომ სწორედ ძლიერი საქართველოა უსაფრთხოების სამსახურის მხრიდან წნეხის სამიზნე.

ამ ფონზე მნიშვნელოვნად ვთვლით გავაკეთოთ განმარტება, რომ დავით ფერაძემ ერთი თვის წინ, მისი ნებით დატოვა პარტია და არ წარმოადგენს პარტია ხალხისთვის წევრს. მიგვაჩნია, რომ საარჩევნო მგრძნობიარე პერიოდში უსაფრთხოების სამსახურს ექნებათ მცდელობები მსგავსი სცენარების განხორციელების.

პარტია ხალხისთვის დიდი ხანია გამოდის ყველა ფორმის ძალადობის წინააღმდეგ და ბუნებრივია, გმობს ძალადობის ყველა გამოხატულებას.

შესაბამისი ვითარებიდან გამომდინარე, ჩვენ, პარტია ხალხისთვის ვწყვეტთ ნებისმიერი სახის თანამშრომლობას დავით ფერაძესთან, მანამ სანამ არ დასრულდება გამოძიება და არ დადგინდება სიმართლე.

პარტია ხალხისთვის აგრძელებს კოალიციის მიზნების მხარდაჭერას და ემზადება 26 ოქტომბრის არჩევნებისთვის, — ნათქვამია გავრცელებულ განცხადებაში.

მედიაში გავრცელებულ განცხადებას, 22 ოქტომბრის ღამესვე გამოეხმაურა კოალიცია ძლიერო საქართველოსთვის, სადაც ძალოვან უწყებებს ფაქტის სასწრაფოდ გამოძიებისკენ მოუწოდებენ.