კოალიცია ცვლილებისთვის წევრის, გიორგი კილაძის თქმით, ქუთაისში საჯარო სექტორში დასაქმებულ ადამიანებს 23 ოქტომბერს, ქართული ოცნების მხარდამჭერ აქციაზე წასვლას აიძულებენ, წინააღმდეგ შემთხვევაში კი სამსახურიდან გათავისუფლებით ემუქრებიან.

"23 ოქტომბერს ქართული ოცნება თბილისში აქციას გამართავს, სადაც მთელი ქვეყნის მასშტაბით, ადამიანების ჯგუფები იძულებით მიჰყავთ. ამ მხრივ, გამონაკლისი არც იმერეთი და კერძოდ, ქუთაისი აღმოჩნდა, სადაც მმართველი გუნდისთვის იძულების მთავარი სამიზნე საჯარო სექტორში დასაქმებული პირები აღმოჩნდნენ. კონკრეტულად, სხვადასხვა სსიპ-ისა და ა(ა)იპ-ების თანამშრომლები, სკოლის მასწავლებლები, ბაღის აღმზრდელები და დასუფთავების თანამშრომლები.

ჩვენ ამ ადამიანების გარკვეულ ნაწილთან კომუნიკაცია გვქონდა, რომლებიც პირად საუბარში ღიად ასახელებენ იმ პირებს, თუ ვინ აიძულებთ მათ აქციაზე წასვლას - ისინი ამ ხალხს ემუქრებიან, რომ თუ 23 ოქტომბერს აქციას არ შეუერთდებიან, დაკავებული თანამდებობების დატოვება მოუწევთ". — თქვა კილაძემ.

23 ოქტომბერს, 19:00 საათზე, ქართული ოცნება თბილისში, თავისუფლების მოედანზე აქციას გამართავს.

თუ გაინტერესებს 2024 წლის საპარლამენტო არჩევნებთან დაკავშირებული მნიშვნელოვანი სიახლეები გაწევრიანდით ჯგუფში — საპარლამენტო არჩევნები 2024.