კომუნიკაციების კომისიამ “რუსთავი 2” და “იმედი”, ფასიანი პოლიტიკური რეკლამების განუთავსებლობის გამო “საარჩევნო კოდექსის” დამრღვევებად ცნო და ადმინისტრაციული სამართალდარღვევათა ოქმი შეუდგინა. ტელეკომპანია "იმედს" ოქმში საზოგადოებრივი აზრის გამოკითხვის შედეგების კანონდარღვევით გავრცელებაც ბრალდება.

როგორც კომისიის განცხადებაში ვკითხულობთ, “რუსთავი 2”-ს პოლიტიკურმა გაერთიანებამ ძლიერი საქართველო — ლელომ უჩივლა, რომლის თანახმადაც, მიუხედავად ფასიანი პოლიტიკური რეკლამების განთავსების თაობაზე ტელევიზიასთან გაფორმებული ხელშეკრულებისა, მაუწყებელმა არ განათავსა “ლელოს” მიერ მიწოდებული ფასიანი პოლიტიკური რეკლამა.

ამასთან ვკითხულობთ, რომ პოლიტიკურმა გაერთიანება ლელომ ტელეკომპანია “იმედსაც” იმავე მიზეზით, პარტიის ფასიანი წინასაარჩევნო პოლიტიკური რეკლამების არ განთავსების გამო უჩივლა. იმავე დღეს, მასობრივი საინფორმაციო საშუალებებით ცნობილი გახდა, რომ “იმედი” უარს აცხადებდა ოპოზიციის პოლიტიკური რეკლამების განთავსებაზე.

კომისიის ცნობით, მაუწყებელმა უნდა დაიცვას დისკრიმინაციის აკრძალვის მოთხოვნა და თანასწორად უზრუნველყოს ყველა მსურველი საარჩევნო სუბიექტის წარდგენილი პოლიტიკური რეკლამის განთავსება, წინააღმდეგ შემთხვევაში, ეს კანონდარღვევად ჩაითვლება.

“საქართველოს „საარჩევნო კოდექსის“ თანახმად, მაუწყებელი ვალდებულია ცესკოს და კომუნიკაციების კომისიას კენჭისყრამდე არაუგვიანეს მე-60 დღიდან, 5 კალენდარული დღის ვადაში, გადასცეს ინფორმაცია ფასიანი წინასაარჩევნო რეკლამის განსათავსებლად საეთერო დროის ტარიფების შესახებ. ტარიფები ძალაში შედის 50-ე დღიდან. მაუწყებელი, რომელიც აქვეყნებს ტარიფს, ვალდებულია განათავსოს მისთვის წარდგენილი ფასიანი რეკლამა, ხოლო არ განთავსების შემთხვევაში, ის დაარღვევს კანონს. ამასთან, კომუნიკაციების კომისიის მიერ შემუშავებული გზამკვლევის თანახმად, მაუწყებელმა უნდა დაიცვას დისკრიმინაციის აკრძალვის მოთხოვნა და თანასწორად უზრუნველყოს ყველა მსურველი საარჩევნო სუბიექტის მიერ სათანადოდ წარდგენილი ფასიანი პოლიტიკური რეკლამის განთავსება”, — ვკითხულობთ განცხადებაში.

ამასთან, აღნიშნულია რომ “იმედმა” 9 ოქტომბერს “საზოგადოებრივი აზრის გამოკითხვის შედეგების შესახებ ინფორმაციის გავრცელებისას, არ მიუთითა გამოკითხვის დამკვეთი, მეთოდი, შესაძლო ცდომილების ფარგლები და ამასთან, არ იყო დაკონკრეტებული გამოკითხვა უფასო იყო თუ ფასიანი”. მომდევნო დღეს, გამოკითხვის შედეგების გამოქვეყნებისასაც არ მიუთითა თარიღი, მეთოდი და შესაძლო ცდომილების ფარგლები.

“საქართველოს „საარჩევნო კოდექსის“ თანახმად, არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნებისას უნდა მიეთითოს გამოკითხვის დამკვეთი, გამოკითხვა ფასიანია თუ უფასო, ასევე, ორგანიზაცია რომელმაც ჩაატარა გამოკითხვა, გამოკითხვის თარიღი, მეთოდი, გამოკითხვაში გამოყენებული კითხვების ზუსტი ფორმულირება და შესაძლო ცდომილების ფარგლები.

კომუნიკაციების კომისიამ შესწავლილი გარემოებებიდან გამომდინარე მიიჩნია, რომ „რუსთავი 2“-სა და „ტელეიმედის“ მიერ დარღვეულია საქართველოს „საარჩევნო კოდექსი“, შესაბამისად, აღნიშნული ტელევიზიები სამართალდამრღვევებად სცნო და მათ სამართალდარღვევათა ოქმი შეუდგინა”, — აღნიშნულია განცხადებაში.