დღეს გაიხსნა გზა, რომლის მშენებლობის პროცესი მრავალი გამოწვევის ფონზე მიმდინარეობდა. ურთულეს გეოლოგიურ პირობებში, სხვადასხვა ტიპის გამოწვევის გადალახვით, აშენდა 14 კმ-იანი, 2 ზოლიანი, ასფალტ-ბეტონის მაგისტრალური გზა, რომელიც მოიცავს 20 ხიდსა და 5 გვირაბს, არის სრულ შესაბამისობაში საგზაო უსაფრთხოების თანამედროვე ნორმებთან და სტანდარტებთან და აღჭურვილია საგზაო განათების სისტემით, — ამის შესახებ რეგიონული განვითარებისა და ინფრასტრუქტურის მინისტრმა ირაკლი ქარსელაძემ ბათუმის შემოვლითი 14 კმ-იანი მაგისტრალური გზის გახსნის ღონისძიებაზე განაცხადა.

მისი თქმით, ძველ გზაზე მოძრავი ტრანსპორტის 43% ბათუმის შემოვლითი გზით იმოძრავებს და იდეალურ შემთხვევაში, დაახლოებით ოთხჯერ ნაკლები დრო — 8-9 წუთი იქნება საჭირო მახინჯაურიდან ხელვაჩაურამდე მანძილის დასაფარად.

მინისტრის განცხადებით, მალე დაიწყება ბათუმი-სარფის მაგისტრალური გზის მშენებლობაც, რომლითაც საკურორტო დასახლებების ტურისტული პოტენციალი კიდევ უფრო გაიზრდება. სარფამდე მისასვლელი ახალი მაგისტრალური გზა, 7.5 კმ-იანი გვირაბით სრულად განტვირთავს მოძრაობას ამ დასახელებებშიც.

"დავიწყებთ ქობულეთის შემოვლითი გზის დამატებითი 2 ზოლის მშენებლობას და რაც მთავარია, 2025 წელს თბილისიდან ბათუმამდე მგზავრობა უკვე სრულად მაგისტრალური გზით იქნება შესაძლებელი", — აღნიშნა ირაკლი ქარსელაძემ.

რეგიონული განვითარებისა და ინფრასტრუქტურის სამინისტროს ცნობით, მინისტრმა მადლობა გადაუხადა პროექტში ჩართულ ყველა ადამიანს და ასევე, განვითარების პარტნიორებს — აზიის განვითარების ბანკსა და აზიის ინფრასტრუქტურის საინვესტიციო ბანკს, წარმატებული და მრავალწლიანი თანამშრომლობისათვის.