ინტერნეტს ჩვენსავით აქტიურად თუ არ ადევნებ თვალს, ბოლო კვირებში ძალიან ბევრ რამეს გამოტოვებდი.

სანამ ბიძინა ივანიშვილი მოძრავი აკვარიუმით საქართველოს სხვადასხვა ქალაქს სტუმრობს და თავისი დამქაშებისგან გაუთავებელ მადლობებს ისმენს, ჰოლივუდი უდიდესმა სკანდალმა მოიცვა. შონ ქომბსის, იგივე "დიდის" ამბებს უკვე გაიგებდით და თავს აღარ შეგაწყენთ. ინტერნეტის ამბავი ხომ იცით — ერთი ამბავი გასკდება და ჭორები უკონტროლო ხდება ხოლმე. "დიდის" ამბავს ხალხმა მალევე დაუკავშირა მისი მეგობრები — ბიონსე და ჯეი-ზი. ტიკ-ტოკსა და ინსტაგრამზე ხუმრობენ, რომ ბიონსეს ყველა მომღერალი იმიტომ უხდის მადლობას, რადგან შიშობენ, ემანდ განაწყენებულმა ბიონსემ ჩვენი თავი "დიდის" არ მოაკვლევინოსო.

ბიონსესთვის მადლობის გადახდის ტრენდმა ბევრი გვაცინა და ჩვენთვის კარგად ნაცნობი პოლიტიკოსი გაგვახსენა, რომელსაც ასევე ძალიან უყვარს მადლობას როცა უხდიან — ბიძინა ივანიშვილი. წარმოგიდგენთ კიდევ 10 მსგავსებას, რომელსაც ბიძინა ივანიშვილსა და ბიონსეს შორის მარტივად შენიშნავთ.

1. ორივეს სახელი ბ-ზე იწყება

ბიძინა, ბიონსე... როგორც ჩანს, ბ-ზე დაწყებული სახელების მფლობელები დაბადებიდან დივები არიან.

2. ორივეს უყვარს ზებრები

ბიონსეს რენესანსის ტურზე ზებრას პატერნის კოსტიუმი ეცვა, ბიძინა ივანიშვილის ეზოში კი ნამდვილი ზებრა დარბის...

3. ორივე დასავლეთიდანაა

ბიძინა ივანიშვილი წარმოშობით საქართველოს დასავლეთის გულიდან, საჩხერიდანაა, ბიონსე კი "ველური დასავლეთიდან" — ტეხასიდან.

4. ორივეს არტისტი შვილი ჰყავს

ბიონსეს შვილი, ბლუ აივი, უკვე 12 წლისაა და დედასთან ერთად ხშირად გამოდის სცენაზე. ბიძინა ივანიშვილის შვილი, ბერაც, თვითგაცხადებული რეპერია — მისი მუსიკა და ფანები დავიწყებას არასდროს უნდა მიეცეს!

5. ორივეს უყვარს შუშა

ბიძინა ივანიშვილი მოძრავი შუშის აკვარიუმით გადაადგილდება, ბიონსემ კი ეს აკვარიუმი დაამსხვრია და ამოიცვა.

6. რომელიმე რომ გალანძღო, მისი თავგადაკლული ფანი ყელს გამოგღადრავს

თითქოს თავად ბიძინასა და ბიონსეს შორის არსებული მსგავსებები არ კმაროდა, ორივეს ისეთი ფანები ჰყავს, მათზე არც ერთ გადაბრუნებულ სიტყვას რომ არ შეგარჩენენ! თუმცა, ბიონსეს ფანებისგან განსხვავებით, ბიძინას მოყვარულები "ნაცსაც" დაგიძახებენ და "აგენტსაც"...

7. ორივე სასახლეში ცხოვრობს

ხომ გითხარით, ორივე გიჟდება შუშაზე-თქო?! აბა, თუ გამოიცნობთ, რომელი სახლია ბიონსესი და რომელი — ბიძინასი?

8. ორივეს უყვარს ტრიოს ბრილიანტობა

"აქეთ-იქით მაიმუნი, შუაშია თაიგული" ალბათ, ორივეს საყვარელი ფრაზაა. ბიონსემ მოღვაწეობა "Destiny's Child"-ში, მუსიკალურ ტრიოში დაიწყო, სადაც ყოველთვის ჩრდილავდა კელის და მიშელს. ბიძინა ივანიშვილსაც ჰყავს ფონის გამფორმებლები — ხან მამუკა მდინარაძე და ირაკლი კობახიძე, ხან ირაკლი ღარიბაშვილი და კახი კალაძე... მოკლედ, ბიძინა ივანიშვილს საკუთარი კელის და მიშელის მთელი არმია ჰყავს.

9. ორივე უსაშველოდ მდიდარია

ბიონსეს ქონება ბოლო მონაცემებით $760 მილიონია, თუმცა ბიძინა ივანიშვილმა მასაც აჯობა — ოფიციალურად, მისი ქონება $7.52 მილიარდია (აქ არაა გათვალისწინებული ბიუჯეტის ფული).

10. ოხუნჯობით ორივე გამოირჩევა

ბიონსეს კი უყვარს ხოლმე ღამის შოუებში ხუმრობების ფრქვევა, მაგრამ, ბიძინას "შედი, ქალო, ბუტკაში!" შეუდარებელი ანეკდოტია, რომლის თამასას ბიონსე ვერასდროს შესწვდება.

ხუმრობა იქით იყოს და, რა თქმა უნდა, იცი, რომ არჩევნები გვიახლოვდება და საქართველოს თითოეული მოქალაქის ხმა გადამწყვეტია ჩვენი ქვეყნის ევროპული მომავლისთვის. დარწმუნებული ვართ, მოქალაქეობრივ ვალს შენც მოიხდი, საქართველოსთვის სწორ არჩევანს გააკეთებ და მერე ერთად გავაგრძელებთ ჩვენს სახალისო სტატიებზე სიცილს.