ბავარიის სახელმწიფო კრიმინალური პოლიციის ოფისმა ქართული დანაშაულებრივი დაჯგუფების წინააღმდეგ სპეცოპერაცია ჩაატარა. დაკავებულია 12 პირი. ამის შესახებ ინფორმაციას ადგილობრივი მედია ავრცელებს.

გავრცელებული ინფორმაციით, 9 ოქტომბერს ბავარიის სახელმწიფო კრიმინალური პოლიციის ოფისის თანამშრომლებმა, ქართული დანაშაულებრივი ბანდის წინააღმდეგ, სპეცოპერაცია ჩაატარეს გერმანიის რამდენიმე ქალაქში, მათ შორის — როიტლინგენში, შტუტგარტში, ჰამბურგსა და ბერლინში. სპეცოპერაციაში მონაწილეობდა 200 ოფიცერი, აქედან 150 უშუალოდ როიტლინგენში იყო განლაგებული.

გერმანული მედია წერს, რომ სპეცოპერაცია მასშტაბურ ქურდობებს უკავშირდება, რომლის დროსაც მოპარულ ნივთებს კრიმინალური დაჯგუფების წევრები საქართველოში გზავნიდნენ.

ჩხრეკის დროს 12 ადამიანი დააკავეს — მათგან თერთმეტი როიტლინგენში, ერთი — შტუტგარტში. მთავარი ეჭვმიტანილი, 54 წლის ქართველი, საქართველოს ფოსტის ოფიციალური ქვეკონტრაქტორია. რაც ნიშნავს იმას, რომ მას ევალებოდა ამანათების გაგზავნა გერმანიიდან საქართველოში და საქართველოში განთავსებული ამანათების გერმანიაში მიტანა.

ბავარიის სახელმწიფო კრიმინალური პოლიციის ოფისის ცნობით, მან რამდენიმე თვის განმავლობაში მოპარული საქონელი გერმანიიდან, როიტლინგენიდან სატვირთო მანქანით საქართველოში გადაჰქონდათ. მათ შორის იყო მოპარული ველოსიპედები, მობილური ტელეფონები, ელექტრონული ნივთები, ტანსაცმელი, ალკოჰოლური სასმელები და კოსმეტიკა.

პოლიციის ინფორმაციით, დაკავებულებიდან სამი ქართველის მიმართ დაკავების ორდერია გაცემული. დაკავებულია 27-დან 54 წლამდე ასაკის ორი მამაკაცი როიტლინგენიდან და ერთი ქალი შტუტგარტიდან. ისინი ბადენ-ვიურტემბერგში ცხოვრობენ და არ აქვთ მუდმივი საცხოვრებელი გერმანიაში.