რუსეთის ფედერაციის დიქტატორ პრეზიდენტს, რომელსაც 2022 წელს ჯო ბაიდენმა ყასაბი უწოდა, ხოლო საერთაშორისო სისხლის სასამართლოს მასზე დაკავების ორდერი აქვს გაცემული, გუშინ, 7 ოქტომბერს, დაბადების დღე ჰქონდა.

მეზობელ უკრაინაში შეჭრისა და სრულმასშტაბიანი სამხედრო აგრესიის ფონზე იმ ქვეყნების ლიდერების სია სულ უფრო მცირდება, ვინც აგრესორ პრეზიდენტს დაბადების დღეს ოფიციალური წერილით ულოცავს.

მაგალითად, წელს, 2023 წლისგან განსხვავებით, ვლადიმერ პუტინს აზერბაიჯანის პრეზიდენტმა, ილჰამ ალიევმაც აღარ მიულოცა. წლევანდელ ჩამონათვალში ასევე არ გვხვდება ჩინეთის სახალხო რესპუბლიკის ლიდერი სი ძინპინი.

დამოუკიდებელი გამოცემა აგენტსტვო კრემლის პრესსამსახურის და რუსეთის სახელმწიფო სააგენტო ტასის მიერ გამოქვეყნებული ცნობების საფუძველზე წერს, რომ 2024 წელს პუტინს დაბადების დღე მიულოცა 8 ქვეყნის ლიდერმა — ნიკარაგუის, ბელარუსის, თურქეთის, თურქმენეთის, ყაზახეთის და ცენტრალური აფრიკის რესპუბლიკის პრეზიდენტებმა, სომხეთის პრემიერ-მინისტრმა და ბაჰრეინის მეფემ.