1 ოქტომბერს, თბილისის დროით ღამის 3 საათზე, ისრაელის თავდაცვის ძალებმა (IDF) X-ზე გაავრცელეს პოსტი, რომ პოლიტიკური ეშელონის გადაწყვეტილებით, არმიამ შეზღუდული, ლოკალიზებული, მიზნობრივი სახმელეთო რეიდების განხორციელება დაიწყო დაზვერვაზე დაყრდნობით, რაც სამხრეთ ლიბანში ჰეზბოლას ტერორისტული სამიზნეების განადგურებას ემსახურება.

სამიზნეთა შორის მოხვდნენ სამხრეთ ლიბანის სოფლები, რომლებიც, IDF-ის ცნობით, მყისიერ საფრთხეს წარმოადგენდნენ ჩრდილოეთ ისრაელის მოსახლეობისათვის.

სახმელეთო ძალა მხარდაჭერილია ავიაციითა და არტილერიით, სამხედრო სამიზნეები აქტიურად იბომბება.

გაეროს სამშვიდობო ძალები სასაზღვრო რეგიონებში აღარ პატრულირებენ, რადგან ინტენსიური დაბომბვის გამო ამის გაკეთება შეუძლებელია. ორგანიზაციის სპიკერის განცხადებით, 10000 თანამშრომელი პოზიციაზეა, თუმცა პატრულირება ამ ეტაპზე შეუძლებელია.

აშშ-ის პრეზიდენტმა, ჯო ბაიდენმა, განაცხადა, რომ ინფორმირებულია სახმელეთო ოპერაციის შესახებ და ამ ნაბიჯს არ ეთანხმება, რადგან ცეცხლის შეწყვეტის მიღწევა ძალიან მნიშვნელოვანია.