USAID-ის ადმინისტრატორმა, სამანტა ფაუერმა, განაცხადა, რომ შეერთებული შტატები სომხეთს კიბერ, სასაზღვრო და ენერგეტიკული უსაფრთხოების გასაძლიერებლად 20 მილიონ დოლარს გამოუყოფს. რამდენიმე კვირის წინ სააგენტომ სომხეთის 5-წლიანი პაკეტის დაფინანსება გააორმაგა.

განცხადება ოთხშაბათს, სახელმწიფო მდივნის, ენტონი ბლინკენის მიერ ორგანიზებულ ღონისძიება Democracy Delivers Initiative-ზე გაკეთდა.

"მე მოხარული ვარ, ვისარგებლო მომენტით და გამოვაცხადო, რომ კონგრესი, USAID-თან და სახელმწიფო დეპარტამენტთან თანამშრომლობის შედეგად, სომხეთს კიბერ, სასაზღვრო და ენერგეტიკული უსაფრთხოების გასაძლიერებლად 20 მილიონ დოლარს გამოუყოფს", — განაცხადა ფაუერმა.

ღონისძიება გაეროს გენერალური ასამბლეის 79-ე სესიის პარალელურად მიმდინარეობდა და მას სომხეთის პრემიერ-მინისტრი, ნიკოლ ფაშინიანი, ესწრებოდა.

სიახლის პარალელურად, სომხეთში აშშ-ის საელჩომ განაცხადა, რომ დამატებით 600 ათასი დოლარი გამოიყოფა ინფორმაციის სანდოობისა და ინფორმაციული მედეგობის გაძლიერების ინიციატივის ფარგლებში. ეს დაფინანსება მოხმარდება დამოუკიდებელი მედიის ტექნოლოგიური შესაძლებლობების გაძლიერებას, მედიაწიგნიერების კუთხით ინოვაციების მხარდაჭერას და სომხეთში მედიის საკვანძო რეფორმების ადვოკატირების წახალისებას.

სექტემბერში USAID-მა სომხეთის ფინანსური დახმარების 5-წლიანი პაკეტი 120 მილიონი დოლარიდან 250 მილიონამდე გაიზარდა.

შეთანხმების მიხედვით, დამატებითი დაფინანსება მოხმარდება სომხეთში მმართველობის გაუმჯობესებას, სამოქალაქო ჩართულობის გაძლიერებას, ბუნებრივი რესურსების ეკომეგობრულ მენეჯმენტსა და სამიზნე სექტორებში კონკურენციის წახალისებას.

ჯერ კიდევ ივლისში, სომხეთში საქმიანი ვიზიტით ყოფნისას, ფაუერმა 12-მილიონიანი დაფინანსების შესახებ განაცხადა, რომელიც სომხეთის ციფრულ ტრანსფორმაციას, საკვების უსაფრთხოებისა და კომუნიკაციების გაძლიერებას მოხმარდება. ასევე, აპრილში, აშშ-ის, ევროკავშირისა და სომხეთის წარმომადგენლების ბრიუსელში ერთობლივი შეხვედრის შემდეგ, სომხეთმა დამატებით 65 მილიონი დოლარი მიიღო.

25 სექტემბერს სომხეთის საგარეო საქმეთა მინისტრი, არარატ მირზოიანი, შეიარაღებისა და საერთაშორისო ურთიერთობების საკითხებში აშშ-ის სახელმწიფო მდივნის მოადგილეს, ბონი ჯენკინსს, შეხვდა. მხარეებმა სომხეთისა და აშშ-ის სტრატეგიული პარტნიორობის განვითარების შესაძლებლობები განიხილეს.

მირზოიანმა აღნიშნა, რომ სომხეთი დემოკრატიული რეფორმების გასატარებლად აშშ-ის მხარდაჭერას ძალიან აფასებს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.