თურქეთის სახელით მოასპარეზე 27 წლის მძლეოსანმა რამილ გულიევმა ლონდონის მსოფლიო ჩემპიონატზე 200 მეტრ დისტანციაზე ოქროს მედალი მოიპოვა.

გულიევმა 20,09 წამში დაფარა 200-მეტრიანი დისტანცია და უკან ჩამოიტოვა სამხრეთ აფრიკელი ვან ნიკერკი (20,11) და ჯერემი რიჩარდსი (20,11) ტრინიდადი და ტობაგოდან.

"ამ შეჯიბრში საუკეთესო შედეგი ვაჩვენე. საჭირო დროს საუკეთესო გარბენი გავაკეთე. ძალიან მიხარია მსოფლიო ჩემპიონობა. ჩემს კარიერაში საუკეთესო მომენტია,“ - განაცხადა რამილ გულიევმა.

2011 წლიდან რამილ გულიევი თურქეთის სახელით ასპარეზობს, მანამდე კი ის აზერბაიჯანის სახელით გამოდიოდა.

2017 წლის ლონდონის მსოფლიო ჩემპიონატზე თავისი კარიერა დაასრულა არაერთგზის მსოფლიო რეკორდსმენმა იამაიკელმა უსეინ ბოლტმა. მან 100 მეტრი 9,95 წამში გაირბინა, რითაც მესამე ადგილი დაიკავა, ოქროს მედალი კი 35 წლის ჯასტინ გატლინმა (9.92) მოიპოვა.