საქართველოს დოკუმენტურმა ასოციაციამ ქართული ოცნების მიერ მესამე მოსმენით მიღებულ ჰომოფობიურ კანონთან დაკავშირებით განცხადება გაავრცელა. ასოციაცია ტრანსგენდერი ქალის, კესარია აბრამიძის სასტიკი მკვლელობის შესახებაც აკეთებს კომენტარს:

"გუშინ თბილისში ყველასთვის ცნობილი, ძლიერი, თამამი ტრანსი ქალი მოკლეს.
ჩვენთვის ნათელია, რომ, რაც მმართველი პოლიტიკური ძალის მხრიდან ბეცი პოპულიზმი ან თავისუფლების კონტროლის მცდელობაა, ერთი მოქალაქისთვის ის ტრაგიკულ დასასრულს ნიშნავს.

კანონი “ოჯახური ღირებულებების შესახებ” საფრთხეს უქმნის ქვიარ ადამიანების უსაფრთხოებას, მათ სიცოცხლეს. ასევე, ეს კანონი მალე აკრძალავს სხვადასხვა შემოქმედებითი გამოხატვის ფორმებით — იქნება ეს კინო თუ სხვა — გადმოვცეთ ტრანსი და ქვიარ ადამიანების ამბები, გავუზიაროთ ეს ამბები აუდიტორიას. ეს კანონი აკრძალავს კესარია აბრამიძის ტრაგიკული ამბის გადმოცემას და მაყურებლამდე მიტანას, საბი ბერიანის, ბიანკა შიგუროვას, ზიზი შეყილაძის და სხვა უცნობი ტრანსი ქალებისა, რომლებიც ბოლო წლებში ადამიანების სისასტიკემ თუ გულგრილობამ იმსხვერპლა.

სხვა შეზღუდვებთან ერთად — იქნება ეს შეკრებისა თუ ინფორმაციის გავრცელების თავისუფლება — კანონი ცენზურას აწესებს ფილმებზე, რომელიც არ შეესაბამება ჰომოფობიურ პოლიტიკას, რომელიც ქვიარ ადამიანებზე მოგვითხრობს. ის პირდაპირ ეხება დოკუმენტურ კინოს, რომლის საშუალებითაც მაყურებელს შეუძლია სიღრმისეულად ჩასწვდეს ისტორიებს, ადამიანთა ამბებს. და ვინ განსაზღვრავს რა არის კანონში მოხსენიებული “პოპულარიზაცია” და რა — უბრალოდ ცხოვრება, ხედვა, აზრი?

ეს კანონი უსამართლოა. ის მიმართულია სიტყვის თავისუფლების, შემოქმედებითი გამოხატვის თავისუფლების წინააღმდეგ. ის თვალებზე ხელებს აფარებს მაყურებელს და პირს უკერავს საზოგადოებას.

იმედი გვაქვს, რომ თავისუფალი აზრის, თავისუფალი თვითგამოხატვის დევნა მალე აღარ იქნება ქართული პოლიტიკის განმსაზღვრელი და შევძლებთ ვიმოქმედოთ თანაბარუფლებიან საზოგადოებაში, სადაც ყველა ადამიანის ღირსეული ადგილი მოიძებნება." — ნათქვამია განცხადებაში.