შუქრუთელებმა პარლამენტთან მეორე ღამე გაათიეს. დღეს მაღაროელების უწყვეტი პროტესტის 185-ე და შიმშილობის მე-13 დღეა. გაფიცულებიდან ხუთ მათგანს პირი აქვს ამოკერილი.

პროტესტის მონაწილეებმა საქართველოს პარლამენტის შენობასთან 11 სექტემბერს გადმოინაცვლეს. მას შემდეგ, რაც პოლიციამ ადგილზე კარვების გაშლის საშუალება არ მისცა, ისინი ღია ცის ქვეშ ათევენ უკვე მეორე ღამეს.

ჟურნალისტი მარიამ ნიკურაძე სოციალურ ქსელში წერს, რომ მოშიმშილეებს წნევა და შაქარი დაუვარდათ და სასწრაფო დახმარების ეკიპაჟს ხშირად იძახებენ, კლინიკაში გადაყვანასა და მკურნალობაზე კი უარს ამბობენ.

“მოშიმშილეებს წნევა და შაქარი დაუვარდათ, ცუდად არიან. სასწრაფო უფრო და უფრო ხშირად მოდის და ამოწმებთ. საავადმყოფოში გადაყვანაზე და მკურნალობაზე უარს ამბობენ.

წვიმას იწყებს, კარავი არ აქვთ, ასე გაათენებენ, ქოლგებით და პარკებით.

პოლიცია დგას ჩასაფრებული, შემთხვევით ვინმემ კარვის გაშლა არ გაბედოს. ათობით პოლიციელია ყველა მხარეს, როგორც არიან ხოლმე", — წერს მარიამ ნიკურაძე.

შეგახსენებთ, რომ პარლამენტთან შეკრებილი აქციის მონაწილეები ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.