ილონ მასკის გუშინდელ სექსისტურ პოსტს ტეილორ სვიფტის დაფეხმძიმების შესახებ ის პიროვნება გამოეხმაურა, რომელიც ყველაზე კარგად იცნობს მასკს მამის ამპლუაში: მისი უფროსი შვილი, ვივიანი.

20 წლის ვივიან ჯენა უილსონი ილონ მასკისა და მწერალი ჯასტინ მასკის ტყუპებიდან ერთ-ერთია. მამის გუშინდელ კომენტარს ვივიანი threads-ზე გამოეხმაურა და მასკის კომენტარს "სექსისტური" და "ინსელური (ინსელი — თავისი ნების საწინააღმდეგოდ სექსუალურად არააქტიური პირი) სისულელე" უწოდა.

"ტეილორ სვიფტი კამალა ჰარისისთვის საჯარო მხარდაჭერის გამოსაცხადებლად ამაზე უკეთეს დროს ვერ შეარჩევდა. ერთი სული მაქვს, სვიფტიებს (ტეილორის ფანებს) როდის ვნახავ არჩევნებზე. ხმა მიეცით ლურჯს!" — დაწერა უილსონმა და შემდეგ მასკის პოსტსაც შეეხო - "დიახ, ასევე, ვნახე "ის ტვიტი", საძაგელი, ინსელური სისულელე მართლაც რომ საძაგელი ინსელური სისულელეა. მეტს ვერაფერს დავამატებ. ეს უბრალოდ საზიზღრობაა. ეს აშკარაა და თუ ამას ვერ ხვდებით, მაშინ თქვენც პრობლემის ნაწილი ხართ."

Post by @vivllainous
View on Threads

"ასევე, ჩემს აუდიტორიას მინდა ვუთხრა, რომ ხალხს თქვენთან ასე ლაპარაკის უფლება არ მისცეთ. ეს გულისამრევი, დამამცირებელი და საოცრად სექსისტურია. თქვენ უკეთესს იმსახურებთ," — დაამატა ვივიანმა, რომელიც ტრანსგენდერია და მამის ტრანსფობიურ თუ მიზოგენურ მსოფლმხედველობას ემიჯნება.

ცნობისთვის, კამალა ჰარისისა და დონალდ ტრამპის საპრეზიდენტო დებატების შემდეგ სუპერვარსკვლავმა მომღერალმა დემოკრატებს საჯაროდ დაუჭირა მხარი და პოლიტიკური განცხადება გამოაქვეყნა, რის შემდეგაც ილონ მასკმა მის მიმართ შეურაცხმყოფელი პოსტი გამოაქვეყნა ტვიტერზე/ X-ზე.