"ეძგვერაძეს და "ჭყიპინებს" თავი დაანებეთ, ეძგვერაძე არაფერ შუაშია, მე ერმილე გიგიაძეზე გელაპარაკებით და თქვენ "ჭყიპინაზე" მელაპარაკებით, რომელიც სავარაუდო დამნაშავის დაკავებაში ხელს უშლიდა პოლიციას", — ამის შესახებ ჟურნალისტებთან საუბრისას საპარლამენტო უმრავლესობის ლიდერმა, მამუკა მდინარაძემ განაცხადა.

მისი თქმით, ოპოზიციურ ფლანგს ირაკლი ეძგვერაძის, იგივე "ჭყიპინას“ დაკავებით მათი მხარდამჭერის, ერმილე გიგიაძის გარდაცვალების ფაქტის გადაფარვა სურს.

"როცა ცდილობთ, რომ პოლარიზაციას გადააბრალოთ ეს ყველაფერი, პოლარიზაციაც ეს არის, ფაშიზმიც ეს არის, ნეოფაშისტური, ფსევდოლიბერალური პროპაგანდაც ეს არის, "რუსულს" რომ ეძახით ყველაფერს სიცრუის ტირაჟირებით - ეს პროპაგანდა კლავს. ეძგვერაძეს და "ჭყიპინებს" თავი დაანებეთ, ეძგვერაძე არაფერ შუაშია, მე ერმილე გიგიაძეზე გელაპარაკებით და თქვენ "ჭყიპინაზე" მელაპარაკებით, რომელიც სავარაუდო დამნაშავის დაკავებაში ხელს უშლიდა პოლიციას. წარმოიდგინეთ, თქვენი პროპაგანდის მსხვერპლზე, ერმილე გიგიაძეზე გელაპარაკებით, თქვენი პროპაგანდის მსხვერპლზე ოთხი წლის წინ — თედო გობეჯიშვილზე გელაპარაკებით და ეძგვერაძეო, ეძგვერაძე კი არა, ეს არის თქვენ მიერ სიაში ჩასმული "ჭყიპინა", წარსულში სისხლის სამართლის დანაშაულში ბევრჯერ მხილებული ადამიანი როგორც ვიცი და თუ მეშლება უკაცრავად, რომელიც დააკავეს იმის გამო, რომ როგორც ვიცი, სავარაუდო დამნაშავის დაკავებაში უშლიდა ხელს და შეურაცხყოფას აყენებდა პოლიციელებს. ახლა, გინდათ, "ჭყიპინათი" თქვენი პროპაგანდის მსხვერპლის, ერმილე გიგიაძის გარდაცვალება გადაფაროთ და არ გადაგაფარვინებთ“, — განაცხადა მდინარაძემ ჟრნალისტებთან.

დღეს წყალტუბოში ქართული ოცნების მხარდამჭერი, ერმილე გიგიაძე გარდაიცვალა. ტელეკომპანია იმედის ინფორმაციით, გიგიაძე ნერვიულობის ნიადაგზე მას შემდეგ გარდაიცვალა, რაც მას ნაციონალური მოძრაობის წევრმა "მძიმე სიტყვიერი შეურაცხყოფა მიაყენა".

მომხდარს ქართული ოცნების ლიდერები ეხმაურებიან. მმართველი პარტიის წევრების მთავარი გზავნილი წყალტუბოში მომხდარ უბედურ შემთხვევაზე კომენტირებისას ასეთია: "ნაციონალური მოძრაობა კლავს".

ამ თემაზე წაიკითხეთ:

წყალტუბოში ქართული ოცნების მხარდამჭერის სიკვდილს მმართველი პარტიის წევრები ეხმაურება